Mawkyrwat, Naiwieng 13
Ka kynhun ïalehkai jong ka Evergreen S&CC Nongjri ka la lah ban pynthikna ban ïoh rung sha ka quarter final ha ka lympung ïalehkai Golden Jubilee Celebration Football Tournament ba la pynïaid da ka Nonglang SC. Kane ka la wan urlong hadien ba ka la pynliem noh ïa ka Spirit Warrior FC da 2-0 kol ha ka jingïakhun kaba la long ha ka 12 tarik mynta u bnai ha madan Pyndenïew Lyngdoh kaba ha Nonglang, South West Khasi Hills District.
Ka jingïalehkai ha kane ka sngi ka la long kaba itynnad bad pynïap bieit ïa ki paidbah ‘riew ïeit phutbol. Ha ka kylla step da ka jinglah ban ïalehkai bha, ka Evergreen ka la ïoh ban pynkhih jar nyngkong eh ha ka minit kaba 25 lyngba u Famous Nongtnger bad haba bteng ïa ka jinglehkai haduh ban da kut ka kylla step ka Evergreen ka la tam shi kol.
Haba phai sha ka kylla miet, na ka liang ka Spirit Warrior ka la ïoh shibun ki kabu ban thep kol, hynrei kam shym lah ban pynurlong. Dei ha ka minit kaba 87 ba ka Evergreen Nongjri ka la thep biang sa shi kol lyngba u Famous Nongtnger, uba la ïoh ban shut ïa ka penalty bad ban pynlong ïa ka Evergreen ban jop syndon.
Ïa ka nam Player of the Match la ïohpdiang da u Famous Nongtnger bad ïa ka khusnam la sam da u Bah Lastforming Lyngdoh.
Na ka liang ka Nonglang SC lyngba u Bah Kordorlyne Kharlyngdoh, Secretary u la pyntip ha ka 18 tarik kan dei ka jingïalehkai quarter final kaba nyngkong ha kaba ka Pynnoh Ri War FC kan ïakhun pyrshah ïa ka Rangjadong SC ha ka por 2:00 baje nohphai sngi.
