Shillong, Naiwieng 14
Ka lympung ïalehkai 1st Division Football League 2024 ba la pynïaid da ka Shillong Sports Association (SSA) ka la nangjam shaphrang ha kaba ka Sohryngkham SC bad ka Nongrah SC ki la ïoh jingjop ha ka Sngi Palei ha SSA Stadium kaba ha Polo.
Ha ka jingïakhun kaba nyngkong, ka Sohryngkham ka la pynliem noh ïa ka Mylliem SC da 5-2 kol bad u Ïarboklang Kshiar u la ïoh hat-trick.
Ha kane ka jingïakhun ka Sohryngkham ka la ïoh ban pynkhih jar nyngkong eh lyngba u Wallam Kharpran ha ka minit kaba 21. Kane ka kynhun ka la pynbud biang ïa ka kol kaba ar ha shwa ban kut ka kylla step lyngba u Winstar Roy Kharpran (40) na ka bynta ban tam da 2-0 kol.
Hadien katto-katne por ba la bteng ïa ka jingïakhun jong ka kylla miet, ka Mylliem ka la lah ban pynphai kylla shi kol lyngba u Closing Lyngdoh (57). Hapdeng kane ka jingïakhun ka Sohryngkham ka la lah ban thep biang sa lai kol lyngba ka hat-trick na u Ïarboklang ha ka minit kaba 80, 85 & 87. Shwa ban wai ka Mylliem ka la lah ban pynphai kylla shi kol lyngba u Lamphrang Mukhim (90+3) ha shwa ba kan mad ïa ka jingshah rem.
Haba phai sha kawei pat ka jingïakhun, ka Nongrah SC ka la jop da 2-1 kol ïa ka Lawsohtun SC. Kane ka la wan urlong lyngba u Evening Lartieng uba la ïoh thep ha ka minit kaba 4 bad u Mebatskhem Lyngkhoi (87). Hynrei ka Lawsohtun ka la pynphai kylla shi kol lyngba u Rishanskhem Nongkynrih (47) shwa ba kan mad ïa ka jingshah rem.
Kane ka lympung kan bteng biang ha ka Sngi Thohdieng ha kaba ka Nongkseh SC kan ïakhun pyrshah ïa ka Mawkhar SC ha ka por 12:15 mynsngi, katba ka Mawtawar SC ïa ka Malki SC ha ka por 3:15 nohphai sngi.
