Jerusalem, Naiwieng:
Ka Israel ha ka Sngi Balang ka la iathuh ba ki shipai ka Israel ha kane ka sien ki la shah ther tyngeh ha ki lehnoh Hezbollah hapdeng ka jingleit tur bad jingleit khynra jong ki sha Lebanon ha ka Sngi Balang, ha kaba 6 ngut ki shipai ka Israel ki la kyllon iap ha katei ka sngi.
Kitei ki shipai Israel ki la kyllon iap hapdeng ka jingiakhun bad ki lehnoh Hezbollah sha ka phang Shathie jong ka Lebanon bad da kane, ka jingdon ki shipai ka Israel kiba la kyllon iap hapdeng ka jing-iakhun bad ki Hezbollah ka la kiew sha ka 47 ngut naduh ka 30 tarik u Nailur ba ka Israel ka la sdang ia ka jingiakynad bad ka Hezbollah.
Kane ka jingpynbna jong ka tnat shipai Israel ka long hadien ba u heh ba thymmai ka tnat ïada ri jong ka Israel, u la ong ba ka Israel kan nym pynjem ia ka jing-iakhun bad ki Hezbollah ha Lebanon.
Namar la ong ba naduh ka 23 tarik hi jong u Nailur, ka Israel ka la sdang ban leit therbom ia ka Hezbollah sha Lebanon, khamtam ha ki bynta Shathie jong ka nongbah Beirut bad sha ka phang Mihngi bad Shathie jong katei ka ri. Hynrei, dei ha ka 30 tarik jong utei u Nailur, ba ka Israel ka la phah syndon da ki shipai ryngkew ban leit tur bad khynra sha katei ka ri ba marjan, ha kaba ki shipai Israel ki la lap ia bun tylli ki ktem jong ki lehnoh Hezbollah na kitei ki shnong khappud jong ka Israel bad ka Lebanon.
Hynrei la ong ba ka jingiakynad hapdeng ka Hezbollah bad ka Israel ka la neh mynta la kumba shi snem, naduh ba ka Hezbollah ka la ai jingkyrshan ia ka Hamas namar ka jingleit hiar thma jong ka Israel sha Gaza Stip bad ka Hezbollah ka la maham ia ka Israel ba ka dei ban sangeh noh shi syndon ia ka thma jongka ha Gaza.
