Washington, Risaw:
Ka tnat kam bar ri jong ka India ka la iathuh ba ka India ka dang bud-dien sani ïa ki jingjia kiba kongsan ha ka saiñ hima- sima ha kane ka thaiñ, kynthup ïa ka jingïalang ha Iran kaba la iadon bynta lang bad ki heh sorkar na Saudi Arabia, Turkey, Pakistan bad Iran.
Haba jubab halor ki jingkylli jong ka tnat pathai khubor ‘ANI’ halor ka jingïalang ha Iran bad ka jingktah jongka ïa ka ri India, u nongaiktien ka MEA- u Randhir Jaiswal u la ong “Ngi la buddien bha ïa baroh ki jingjia ba kongsan ha ka saiñ hima- sima kiba jia ha kane ka thaiñ kiba don jingktah ïa ki jingmyntoi jong ngi.”
Katei ka jingkren, ka long ha ka por ba ki dang pyniaid ïa ka jingiakren ha Iran, kiba thmu ban pynduna ïa ka jing iakynad ha ka thaiñ bad ban pyntikna ïa ka jingsangeh iasiat hapdeng ka Saudi Arabia bad ka kynhun Houthi jong ka Yemen, ha kaba la iathuh ba ka Iran, ka long ka nong pyniasuk ha katei ka +jingiakren.
Katkum ki khubor jong ki lad pathai khubor jong ka Israel da kaba kdew ïa ki tyllong khubor jong ki riew shimet, ki jingïakren ki la don lang ki heh ophisar na Saudi Arabia, Turkey, Pakistan bad Iran. Ki khubor ki ïathuh ruh ba ka Saudi Arabia ka la tyrwa ïa ka jingïarap pisa sha ki Houthi kum shi bynta ban pynsangeh ïa ki jingthombor ïa kane ka hima. Hynrei ïa ka jingpynkylla kaba la pynbna kaba long USD 1 billion ym shym la pynthikna da kaba laitluid.
Ki jingiakren kiba la iathuh ki wan hapdeng ki jingeh kiba kham heh ha ka thain kiba kynthup ïa ka Iran, ka America bad ka Israel, ha kaba ka Tehran ka wad ban buh ialade kum ka nongpyniasuk ha ka thain.
U Jaiswal u la jubab ruh ïa ki jingkylli halor ka jingïadei kaba nang jur hapdeng ka Maldives bad ka Pakistan hadien ka jingleit jngoh jong u President ka Maldives u Mohamed Muizzu sha Islamabad, ha kaba la ïathuh ba la ïasoi kumba 20 tylli ki jingïateh kular.
“Ka jingiadei jong ngi bad ka Maldives ka long kaba la pynshong nongrim ha ka polisi jong ngi kaba long ki para marjan nyngkong bad ka jingthmu jong ka SAGAR (Ka jingshngain bad ka jingroi na ka bynta baroh ha ka thain),” u la ong bad bynrap ba ka India ka khein ïa ka Maldives kum ka paralok ba kongsan.
U la ong ba ka New Delhi ka dang iai bteng ban kyntiew ïa ka jingiadei paralok bad ka jingmyntoi lang bad u Male, katba ka dang peitngor bha ïa ki jingjia kiba ktah ïa ka jingmyntoi jong ka ri India.
