London, Naiwieng:
U Syiem Charles III jong ka ri Britain ha ka Sngi Palei u la kynjoh sha 76 snem ka rta, hadien ba ma u bad ka pyrsa kurim, ka Catherine, kaba ju khot ka ‘Princess of Wales’, ki dang dep ban ïakhun tyngeh ia ka jingpang bampong.
Kumta la ong ba ha katei ka sngi la iohi ia ka jing-rakhe kaba khraw ha kylleng ki nongbah jong ka ri Britain bad ka jingsawa ki ktang suloi ban rakhe ia kane jingdap 76 snem jong utei u nongialam ka ri. U Charles ha kane ka sngi u la pynlut por naduh dang step da kaba leit jngoh sha ka jaka sam mar bam kaba don sha ka phang Shathie jong ka nongbah London.
Pynban ha kum kane ka sngi khraw, ka kurim jong u – ka Queen Camilla (77 snem ka rta), kam shym la leit lang bad u sha katei ka Coronation Food Hub kaba don ha Deptford naba ka dang shu dep koit shen na ka jingpang shadem bad kaba la pynlong ia ka ban hap kiar shuwa shipor na kiba bun ki kam khamtam ki kam paidbah.
Na ka liang ki kynrem-lyndan jong katei ka ri ki la ai khublei Sngikha ia utei u Syiem ha katei ka sngi, ha kaba u William- u khun ba heh duh jong u bad ki khun ki ksiew baroh, ki la pyllait ia ka dur jong utei u Syiem uba deng ia ka iit-khmat bad ki syntiew ha ka met jong u.
U William u la ong ba kitei 12 bnai ba la leit ki long ki bnai kiba eh namar u kpa bad ka kurim jong u ruh ki hap ban ïakhun tyngeh ia katei ka jingpang ba shyrkhei bad kaba la pynlong ia katei ka longïing ba donburom ba kan hap ban kiar noh shipor na ki kam paidbah ha ki bnai ba la leit.
Utei u Syiem u la ioh jingtip halor ka jingioh pang bampong dei ha u Rymphang jong une snem hadien ba la peit bniah da ki doktor kiba ju sumar bad peit ia u man ka por.
