Tehran, Naiwieng:
Ki bor pynïaid ka Iran ha kane ka por, ki la thmu ban wanrah noh da ki jaka sumar khlieh na ka bynta kito ki kynthei kiba kiar bad ïaid lait ia ka aiñ ba ki dei ban tap jaiñ ia ka khlieh haba ki mih sha ki jaka paidbah.
Kumta, la ong haba iadei bad ka jingpynbna jong ki bor pynïaid ka Iran halor katei ka ‘Hijab Removal Treatment Clinic’, ka nongialam jong ka tnat Women & Family Department, ka Mehri Talebi Darestani, ka la ong ba ha kine ki jaka sumar, yn ai ia ki jinghikai bad jingsumar haba iadei bad ka ‘Scientific bad Psychological Treatment’ haba iadei bad ka jingkwah jong ki kynthei ban lait na katei ka aiñ ‘hijab’ namar kiba bun bah ki paidbah nongshong shnong ka Iran khamtam ki khynnah bad samla kynthei, ki la mih sha khmat ban pyrshah ia katei ka aiñ (hijab) ba la wanrah da ki bor pynïaid katei ka ri. La ong ba ki paidbah nongshong shnong ka Iran khamtam ki kynthei, ki la sdang ban pyni ia ka jingpyrshah haba iadei bad katei ka aiñ, dei hadien ka jingiap jong ka samla 21 snem- ka Amini, katba ka dang don ha thanat ha ka kti ki pulit hadien ba ki pulit ki la rah ia ka sha thanat namar ka jingpynkheiñ ia ka aiñ ‘hijab’, ha kaba ka la mih sha ki jaka paidbah khlem da kah ne tap jaiñ ia ka khlieh kumba ju leh ki kynthei na kitei ki jaitbynriew. Hynrei haba la peit thuh mynta, la iohi ba ki kynthei kiba dei na katei ka jaitbynriew ruh kim sngewtynnad ban kah ne da ia ka khlieh jong ki haba ki mih sha ki jaka paidbah. Pynban kine ki long tang ki kyndon bad ki aiñ ki rukom tynrai ba kitei ki jaitbynriew ki la sdang bad pyntreikam naduh kaba sdang ban seng ia katei ka jaitbynriew ha ki por barim-bajah.
