Athens, Naiwieng:
Katkum ki khubor, la ong ba ka Greece ka dang iakren bad ka Israel ban iarap wanrah ia ka 2 Billion Euro ($2.11 Billion) ka Anti-Aircraft bad ka jingiada na ki ‘namding kaba ju tip kum ka ‘Iron Dome’, kumba ka Israel ka la pyndonkam ia lade. Kane ka long khnang ban pyntikna ia ka jingshngaiñ jong ka Greece ha ki por ki ban wan bad kan lah ïakhun pyrshah bad ban tehlakam lada jia ki jingshah leit thombor kyndit-kyndit kumba long ia ka Israel ha ki por ba la leit.
Katei ka jingiada kan long kum ka Iron Dome bad kiwei de ki tiar ïada ‘namding ki ban lah ban tehlakam ia baroh ki jait ‘namding naduh ki ‘Short Range Missile’ haduh ki ‘Long Range Missile’.
Kumta, la ong ba ka Greece ha kane ka kynti ka la rai ban pynmih pisa kyrpang na ka bynta kane ka kam, khnang ban pyntikna ia ka jingshngaiñ jong ka hadien- habud.
Ki heh ka tnat ïada jong ka Greece, ki la iathuh ba ka Greece ha kane ka por, ka dang iakren bad ka Israel ba kan lah pynurlong ia katei ka jingthmu jong ka bad kan lah ban ioh ia ki juh ki rukom ai jing-iada kumba long ka Israel khamtam ban lah tehlakam ia ki ‘namding kiba wan poi shapoh u pud-sam jong ka ri ha ki por bym poi pyrkhat.
Nalor kane, la ong ba ynda kwah pynurlong ia kane ka kam ka Greece kan hap ban pynmih pisa lane pynlut kumba 12.8 Billion Euro kumno-kumno hapoh jong u snem 2035 khnang ba ka tnat ïada jong ka kan long kaba khlaiñ.
Kane ka jingiada ba ka Greece ka pynkhreh ha kane ka por ka long ruh kum shi bynta jong ka ‘Athens’ ka jingthmu ba 10 snem jong ka tnat ïada ka Greece ban thied ia ki tiar ïakhun thma ki ban kynthup haduh 40 tylli ki jet F-35 bad ki drone na ka United States bad ruh saw tylli ki Belharra Frigate bad ki jet Rafale na ka France.
