Shillong, Naiwieng 17
Ka Meghalaya Football Association ka la pynbna ïa ki kyrteng jong 22 ngut ki rangïalehkai ki ban mihkhmat ïa ka Jylla hapoh ka jingïalam u coach ba pawkhmat u Bah Hering Shangpliang na ka bynta ka Senior Men’s National Football Cham-pionship (Santosh Trophy 2024-25).
Kane ka kynhun ka ban mih na ka nongbah ha ka Lah Sngi U Blei ban leit sha Nalbari, Assam, ka la shah pynïakap ha ka Group-E.
Ha ka jingïalang kitbok kaba la long ha ka Sngi Saitjaiñ, ïa kane ka kynhun hapoh ka jingïa-lam u Fullmoon Mukhim kum u kapten, la ïoh ïa ki kyntien ai mynsiem na u President ka MFA u Bah Hamletson Dohling, kum-juh u General Secretary Bah Sunesh Syiem bad u Vice-President Bah Cliff Nongrum.
“Haba peit ïa ka kynhun, nga tip ba ngi don ka kabu kaba khlaiñ. Kane ka dei ka kabu ksiar ïa phi ban wanrah ïa ka burom na ka bynta ka Jylla bad ngi na ka MFA ngi don ïa ka jingkyrmen kaba khraw na phi,” la ong u Bah Dohling.
Ha katei ka lympung, ka Meghalaya kan ïakhun nyngkong pyrshah ïa ka Arunachal Pradesh ha ka 20 tarik mynta u bnai bud sa ka Nagaland ha ka 22 tarik bad Assam ha ka 24 tarik. Kat kum ka prokram la ong ba tang kawei ka kynhun ka ban wan ha ka kyrdan ba hakhlieh ka ban jam sha kawei pat ka wat jingïakhun.
Hapoh kane ka kynhun la kynthup lang ïa ki rangïalehkai ki don ka jingshemphang bad kiba la ieh bha ha ka kam ïalehkai. Ki la don ruh ïa ka jingïalehkai kaba biang, ha kaba baroh ki la shah jied na ki klob jong ka Shillong Premier League 2024 kumjuh na ki lai tylli ki klob kiba shim bynta ha ka Meghalaya State League 2024, kaba la pynsangeh dangshen khnang ban ailad ïa ki rangïalehkai ba kin ïoh ïa ka por kaba biang ban kilanmet lang ban mihkhmat ïa ka Jylla.
