Washington, Naiwieng:
U nongïalam jong ka China, u Xi Jinping, ha ka sien ba khatduh u la ioh biang ban iakynduh markhmat bad u President ka US- u Joe Biden ha ka Sngi Saitjaiñ, hynrei u la ong ba u pdiang sngewbha ia ka jingiatreilang bad u President ba la shah jied thymmai jong ka US – u Donald Trump bad ïa ki jingthmu jong u, ha kaba u la ong ba ka China ka mynjur bad kloi ruh ban nang iatreilang shuh-shuh bad ka United States hapoh ka jingialam jong u Trump nangne sha khmat.
Ha ka jingiakren jong ki hapdeng jong ka jingialang kaba man la u snem jong ka Asia bad Pacific, u Xi u la kdew ba ka jingiadei kaba skhem hapdeng ka China bad ka US ka long kaba kongsan ym tang ia kine ki arliang ki ri hynrei wat ia ka pyrthei baroh kawei.
Namarkata , u Xi u la ong ba ka US ka dei ban long shemphang bad ka dei ban pyrkhat bha shuwa ba kan shim ia kino- kino ki rai kiba lah ban ktah ia ka jingiadei hapdeng ka US bad China bad na ka liang jong ka China ruh kan ialeh ban pynneh bad pynbha ia ka jingiadei bad ka US khnang ba ka jingiatrei-lang jongki, kan wanrah jingmyntoi ia baroh lang.
Khlem da kdew ïa ka kyrteng jong u Trump, u Xi u la pynpaw ka jingsngewkhia haba iadei bad ki jingkren bad ki rai jong u Trump u ban ialam ia ka sorkar ba thymmai ha US, ioh lehse ki jingthmu bad ki rai jong ka sorkar u Trump ka lah ban ktah ia ka jingiadei hapdeng ka US bad China hadien- habud. Wat la katta, u Xi u la ong ba ka China hi ka kloi ban iatreilang bad ka US lada long kumno- kumno ruh namar dei kine ki 2 tylli ki ri kiba kham don lad ban kyntiew ia ka ioh- ka kot bad ka khaii- ka pateng ha ka pyrthei.
Ha katei ka jingiakren, u Biden u la kyntu ruh ïa u Xi, ba un ialeh ban kyntu ïa ka North Korea ba kan ym leit ai jingkyrshan ia ka Russia ha ka jingleit hiar thma jong ka sha Ukraine.
Wat la katta, la ong ba ym lah ban tip ia kaei ka ban sa jia ia ka jingïadei hapdeng ka US bad ka China hapoh ka jingialam jong u Trump nangne sha khmat hynrei ka China ka la pynpaw ba kam kwah ban iathud bad ka US bad ba ka long ba la kloi ban iatrei lang bad ka US lada ki rai bad jingthmu jong ka US ki long kiba biang bad ki ban ym ktah ia ka China.
