Rio de Janeiro, Naiwieng:
U Myntri Rangbah-duh ka India, u Narendra Modi u la leit poi sha Brazil ha ka Sngi Nyngkong na ka bynta ka jingleit jngoh sha lai tylli ki ri. U Modi ha kane ka ri un ioh ban iashim bynta ha ka jingialang ba heh jong ka ‘G20 Summit’.
Kumta, la ong ba ka tnat kam bar ri jong ka India ka la pyntip ba u Modi ha katei ka Sngi Nyngkong u la leit poi sha Brazil na ka bynta ka jingialang G20 Summit ba la lam khmat da ka Brazil ha une u snem.
Kumjuh ka tnat kam bar ri ka la pynpaw ka jing angnud jong ka India ban ioh ban iamir jingmut bad kitei kiwei pat ki ri naka bynta ban wanrah jingmyntoi ia ka India lem bad ia kitei kiwei ruh ki ri kiba ju iatreilang badka.
Nalor jong u Modi, kitei ki nongialam ki ban iadon bynta ha katei ka jingialang G20 ha Brazil ki kynthup ruh ia u President ka China- u Xi Jinping bad u President ba mynta jong ka US- u Joe Biden bad la ong ba kine ki nong-ialam kin ioh ban shong iamir jingmut lang baroh hajuh ha kitei ar sngi ban pynlong ia katei ka jingialang, kata ha ka 18 bad 19 tarik jong une u Naiwieng.
Ha ka sngi kaba khatduh jong katei ka jingialang, u Modi un sa mih pat ban leit jurip sha Guyana naduh ka 19 haduh 21 tarik une u Naiwieng ban leit sha ka jingkhot sngewbha jong u President katei ka ri- u Mohamed Irfaan Ali. Kane ka long ka sien ba nyngkong eh ia u nongialam na India ban leit rung bad leit jurip sha katei ka ri mynta hadien 50 snem ba ym pat ju don ki nong-ialam na India ki ban leit jurip sha katei ka ri.
Hashwa ba un mih na India ha ka Sngi Saitjaiñ, u Modi u la ong ba ka Brazil ha une u snem ka la ioh ka lad ban lam khmat ia katei ka jingialang jong kitei ki 20 tylli ki ri bad kumta ruh u ngeit ba ka jingleit jong u sha katei ka jingialang kan pyn urlong ia ki jingthmu bad ki mat ba ka India kan leit rah sha katei ka kynhun G20 bad ka ban long ruh ka jingmyntoi lang ia baroh ki ri kiba don ha katei ka kynhun.
Ha ka jingleit jurip jong u sha Nigeria, u Modi u ioh pdiang ia ka khusnam Grand Commander of the Order of the Niger (GCON), ka ban long ruh ka sien ba 2 ia ki nongialam ka pyrthei ba kin ioh ia kum kane ka khusnam na kiwei pat ki ri hadien jong ka Queen Elizabeth II kaba la ioh pdiang ia kum kane ka jait khusnam ha ki snem ba la leit.
Ha kajuh ka por ruh la ong ba ka jingleit jurip jong u Modi sha Nigeria ha kane ka sien, kan long ka sien ba nyngkong eh ia u ban leit jurip sha katei ka ri West Africa hapdeng jong ki 17 snem kiba u la don ha ka kam saiñ pyrthei.
