Beirut, Naiwieng:
U heh ka Lebanon haba ai jingkren sha ki lad pathai khubor ha ka Sngi Nyngkong, u la ong ba ka Lebanon bad ka Hezbollah, ki la dep mynjur ia ka jingtyrwa jong ka United States ban sangeh noh ia ka jingiakynad bad ka Israel, khnang ban wanrah noh ia ka shongsuk-shongsaiñ ha ka pyrthei kumba ka dei ban long baroh shi katta.
Ia mynta hi kam pat don ka jingai jubab na ka liang ka Israel haba iadei bad kane bynta hynrei ka Lebanon ka khmih lynti ba ka Israel ruh kan kloi ban pdiang ia ka jingiasuk khnang ba ki paidbah nongshong shnong kin lait na ki jingeh ba ki la iakynduh ha kine ki sngi.
Ka Hezbollah, ka dei ka kynhun lehnoh ba shyrkhei jong ka Lebanon kaba ioh ka jingkyrshan radbah na ka Iran. Kane kynhun lehnoh ka la iakynad bad ka Israel la kumba shi snem kynthih naduh ba ka Israel hi ka leit ban kput ia ka Hamas da kaba leit hiar thma sha ka nongbah Gaza namar ka jingleit thombor jong ki lehnoh Hamas ia ka Israel ha ka 7 tarik u Risaw jong u snem 2023.
Kumjuh ka Israel ka la leit ban hiar thma ia ka Hezbollah da kaba phah leit tur syndon ia ki shipai ryngkew jong ka sha ki shnong khappud jong ka Lebanon markhap bad ka Israel, ha kaba bun ngut ki lehnoh ka Hezbollah ki la kyllon iap ha ka
jingiakhun bad ki shipai ka Israel bad kumjuh bun ngut ki shipai Israel kiba iap ha katei ka jingiakynad.
