Shillong, Naiwieng 19
Ka long ka jingjah burom ïa ka kynhun ïalehkai ka ri India kaba la ïakhaid da mar 1-1 kol ha ka jingïalehkai paralok pyrshah ïa ka Malaysia (kaba don ha ka kyrdan 133, kata haduh 8 kyrdan ka jingïapher bad ka India) ha ka Lah Sngi U Blei ha Gachibowli Stadium.
Ha kane ka jingïakhun, ka India ka la shah thep ha ka minit kaba 19 lyngba u Paulo Josue, hynrei hadien shiteng kynta ka India ka la wanphai da ka jingkhlaiñ bor na ka bynta ban pynphai kylla lyngba u Rahul Bheke ha ka minit kaba 39 ha kaba u rangapkol ka liang pyrshah u Hazmi Bin um shym la lah ban khang lad na ka jingshah thep.
Kane ka jingïakhaid ka la nang pynskhem ïa ka India ban don ha ka pot1 na ka bynta ka wat balai jong ka AFC Asian Cup 2027 (qualifier), ha kaba ka kyrdan jong ki kynhun yn sa pyllait hadien 10 sngi.
Kane ka jingïalehkai paralok jong ka FIFA ka long borabok kaba kham eh bha, bad ka jingïakhun kaba 33 hapdeng kine ar tylli ki kynhun jong ka dewbah Asia kam shym la pher ha ka Lah Sngi U Blei. Ha ka jingshisha ka India ka la khmih lynti ban ïoh ïa ka jingjop ha kaba kut jong u snem, katba ka Malaysia hapoh ka jingïalam u coach uba na Spain u Pau Martí ka la thaw ki lad ki lynti kumno ban pynliem ïa ka liang pyrshah hakhmat 15,000 ngut ki paidbah nongkyrshan jong ka.
U Marquez u la don ïa ki jingmut jong u ha ka jaka jong ki, bad u la ailad ha ka sien kaba nyngkong ïa u rangïalehkai shakhmat u Irfan Yadwad ryngkat u Lallianzuala Chhangte bad u Farukh Choudhary ha ka bynta kaba shakhmat.
Une u coach jong ka India u la shim ïa ki lad ki lynti ban tynjuh ïa ka jinglah jong u ha katei ka stadium. Hadien baroh, kane ka dei ka jingïalehkai kaba khatduh jong ka India shwa ba kan rung sha ka jingïalehkai kaba kham heh jong ka jingïalehkai Asian Cup ka ban long ha u Lber jong u snem ban wan. Te kumta u la pynïalehkai ha ka sien kaba nyngkong ïa ki lai ngut kiwei pat ki nongïalehkai, kata ïa u Hmingthanmawi Ralte, Jithin MS, bad u Vibin Mohanan.
U rangïalehkai jong ka ri u Brandon Fernandes u la ïohpdiang ïa ka nam Tulsidas Balaram Player of the Match.
