Shillong, Naiwieng 20
U Gaurav Narleng u kylla long u rishot ba skhem jong ka kynhun ïalehkai ka Jylla ïa kaba u la duh da ka said ban kamai ïa ka spah ron (century) ka jong u, kane ka la jia ha ka sngi kaba nyngkong jong ka U-19 men’s Cooch Behar Trophy Elite Group-A hapdeng ka Meghalaya pyrshah ïa ka Delhi kaba la long ha madan ïalehkai ka MCA ha Polo.
Ha kane ka jingïakhun, ka Meghalaya kaba la wan ban tied nyngkong ka la shah pynhap kynsan bun tylli ki wiket kiba shakhmat, kaba pynlong ïa u Narleng ba un hap ban mih shakhmat ban tei ïa ka nongrim kamai ron kaba khlaiñ ïa la ka jong ka kynhun, ha kaba u la lah ban kamai 95 ron kaba la wan na ki 171 tylli ki bol, ha kaba u bynrap lang 19 tylli ki ‘four’.
Ha kane ka jingïakhun ka Meghalaya kaba la jop ïa ka jingkynting pisa, ka la kam trai ban tied nyngkong bad tad haduh ba la pynkut ïa ka sngi, ka la lah ba kan kamai 239 ron hadien ba ka la hap noh 7 wiket na ki 98 over.
Kumba la kdew haneng, ka Meghalaya ha kaba sdang ka la don hapdeng ka khim khiat hadien ba ka la lap ba hap kynsan haduh saw wiket na ka bynta 44 ron nangta 75 ron na ka bynta 5 wiket, pynban ka jingkamai ron paralok (sixth wicket partnership) hadpeng u Gaurav bad u Kshitij Singhania (52 not out), ka la lah ba kan pynskhem ïa ka jingkamai ron ka Meghalaya, hadien ba kine ki arngut ki la lah ban kynjoh haduh 86 ron, hashwa ba u Gaurav un shah pynhap no ha ka kti jong u Dhanya Nakra (1/19).
