Ka Jingpynshai Ka Kur Syiemlieh Kpoh Mawnai – Mawlong halor ka jingkren u Syiem ka Hima Nongkhlaw kaba ïadei bad ki Riti Dustur hiar pateng Long-Syiem hapoh ka Hima

U Bah K. Syiem – General Secretary, Bah A. Syiem, Assistant Secretary, H. Syiemlieh EC Member bad W. B. Syiemlieh EC Member

1.Nyngkong eh ngi kwah ban pyntip sha phi ba na ngi ka kur Syiem Mawnai- Mawlong kiba la don jingïadei bad jinghiar pateng ka jinglong syiem hapoh ka Hima Nongkhlaw naduh ki Longshuwa jong ngi da ki spah snem ba la leit noh naduh ba la seng ïa ka Hima da u Shajer napoh ka Hima Sutnga, kine ki dei kiei kiei kiba ngi tip bad ïoh pateng na u Longshuwa jong ngi shaphang ka Riti ka Dustur long-Syiem ha ka Hima Nongkhlaw, namar ba dei na ka ïing jong ngi ba ka jinglong Syiem ha kane ka Hima ka ïai-bteng haduh mynta.

Ngi don ïa ka Durbar ïing Syiem Mawnai bad kumjuh ruh ngi don ïa ka Dorbar Kur Syiem Mawnai-Mawlong bad ïa ka Seng Kur Syiem Mawnai-Mawlong kaba ngi la seng naduh u snem 1966 bad ka Dorbar ïing Syiem ka lah ju don naduh ki por hyndai hynthai. Te ngin ïa batai bad ïaphai ki por U Mynbarim ki long kumne harum:

U Longshuwa Manshuwa jong ka Hima Nongkhlaw u la seng bad buh ïa ki Nongrim ha kaba ïa dei bad ka jingjied ne jingthung Syiem, jingjied bad jing-thung Nongsynshar bad ha ka Synshar ka Khadar ha ka Niam kaba mut ka “Nia-Im”, ‘Ka Hukum bad ka Jingbthah bad ka Jinghikai U Nongbuh Nongthaw ïa kiba ïa jer, la niew bad la tang ha ka Duwan ka Dupat. ïa kine ki Nongrim ha kaba ka Hima Nongkhlaw ka ri kyntang, la khot ïa ki, “Ki Riti”, Nalor ki Riti ba la ong haneng, ki don ruh ki Nongrim na ki Rukom kiba bha kiba ka Hima Nongkhlaw ka ju leh bad bud pateng la pateng, hynrei ïa kine ym shym la jer ne la ñiew bad la tang ha khmat ka Duwan ka Dupat la kine la khot “ki Dustur”.

Te ngi wan hangne ban pynshai paidbah lyngba jong phi ki lad pathai khubor halor ka jingkynthoh u Syiem Ka Hima Nongkhlaw u Syiem Phrester Syiemlieh kaba la mih ha ka interview ha electronic media interview ba la upload ha ka 03.11.2024 (https://www.youtube.com/watch?v=nl9aNdN3l0k)

a) Ba ka sorkar phareng na ka jingtieng ban thung syiem biang na ka kpoh u Tirot Sing ïoh kan khie biang ka jingïaleh pyrshah la thung da kiwei ki kur hapoh ka jingpynïaid ka sorkar phareng kata da ki kur Syiem Mawnai Mawlong jinglong syiem hapoh ka Hima.

b) Bad dei tad haduh 2005 ba la jied biang pat ïa u Syiem Phrester Syiemlieh uba na ka kpoh u Tirot Sing lyngba ka election ba la pynïaid da ka District council.

Halor kitei ki jingkynthoh haneng ngi kwah ban pynshai ba kitei ki jingkynthoh haneng ki long kiba bakla bad ktah mationg ïa ka kur Syiem Mawnai-Mawlong baroh kawei ban kynthoh ba ïa ngi la thung jubor da ka sorkar phareng ban long syiem hapoh ka hima khlem da don ki sakhi satar kiba biang, bad katei ka jingkynthoh ka long kum ban pynduh pyndam jubor ban pynbakla ïa ka jingïaid lynti ka histori ka Hima Nongkhlaw, ngim tip na kano ka daw ka lah ban don aiu ha lyndet kane ka jingkynthoh ban pynkhun pynbakla ïa ka histori ka jinghiar pateng ba lah ïa ïaid ryntih katkum ki riti ki nongseng ïa ka Hima, bad ban kynthoh ba tad hadien 2005 la ïoh pat da u syiem ba na ka kpoh u Tirot Sing lyngba ka election ba la pynïaid da ka District Council ka dei namar ba katkum (ka Nongkhlaw Syiemship nomination act 1994) ka ailad beit ba uno uno uba dei na ka jait syiem hapoh ka Hima u lah ban ïa contest ban ïakhun syiem hapoh ka Hima Nongkhlaw hynrei ym kumba la ong da u Syiem Phrester Manik Syiemlieh.

Kine ki long kiwei kiwei pat ki sakhi ba wat na ki jingthoh kot khasi kiba la paw bha ruh ki pynksan beit ïa ka jinghiar pateng long syiem hapoh ka Hima Nongkhlaw ka dei beit na ka kpoh Syiem Mawnai-Mawlong bad kine kiei kiei harum ki long ban pynshisha ïa katei ka nongrim kaba ngi kum ka Kpoh Syiem Mawnai-Mawlong ngi ïeng;

Ka snem 1814 lane 1816 ka lah ban dei ka jinglong syiem khynnah lane syiem rangbah jong u Tirot Sing Syiem Ka snem 1826 hadien ka jingïap jong u Konrai Sing Syiem u pyrsa trai jong u Konrai, kata U Rijon Sing u dang don tang kumba 4 ne 5 snem ka ka rta (ïa kane la shim na ka kot “U Tirot Sing” by Dr. Hamlet Bareh), bad ka jinglong syiem u la long syiem pura noh da U Tirot Sing Syiem bad ba lah ban shem na ka jingïateh soskular bad ka East India Company. (30th November, 1826 “A COLLECTION OF TREATIES, ENGAGEMENTS AND SANADS RELATING to INDIA AND NEIGHBOURING COUNTRIES (Revised and Continued up to 1929) Vol; XII: Jammu & Kashmir, Sikkim, Assam & Burma by C. U. AITCHISON”)

Te hangne ka paw ba u U Rijon Sing u khun Ka Ngap ka para jong u Konrai Sing Syiem uba dei hok ma u ban shimti ïa ka khet syiem na u Kñi jong u, U Konrai Sing Syiem, bad U Rijon Sing u la ka kam ïa kane ka jingdon hok ban long syiem ha ka Hima Nongkhlaw ba la thoh na ka kot u Dr. H. Bareh “U Tirot Sing” Letter sent to Govt. Vol. No. 21, 1856. No. 72 of 1856.

Hadien ka jingïap U Tirot Sing, la thung syiem (appointed da u Captain Francis Jenkins Agent to the Governor General North East Frontier) bad kumta U Rijon Sing u dang dei u khynnah uba la don kumba ym palat ïa ka 13 snem eiei ka kyrta uba long u khun Ka Ngap uba dei u pyrsa trai jong u U Konrai Sing Syiem bad ha kata ka por la pynthymmai biang ïa ka soskular bad ka East India Company (29th March, 1834 A COLLECTION OF TREATIES, ENGAGEMENTS AND SANADS RELATING to INDIA AND NEIGHBOURING COUNTRIES (Revised and Continued up to 1929) Vol; XII: Jammu & Kashmir, Sikkim, Assam & Burma by C. U. AITCHISON”)

Te u Rijon Sing hadien ba u la shem ba um lah ban pynïaid ïa ka Hima namar ba mih ka jingeh ha kaba ïa dei bad ka synshar ka khadar hapoh ka Hima bad u la dap ram shi kat dei bad dei ha ka por ba synshar U Rijon Sing ka sorkar ka la pynïakhlad ïa ki 9 tylli ki Raid,Shella bad ka Raid Sohïong na ka Hima Khapsawphra (La shim kane na ka na ka “Succession To Syiemship In The Khasi States” da u Captain D. Herbert), bad kumta ïa ka Sohïong la synshar da ki Lyngdoh Thabah kiba don ïa ka jingïadei kur na ka kpoh Nongshai bad Sohkhaser kiba mih na ka ïing Syiem Nongkhlaw ha ki por mynshuwa kata na ka Sanglar kaba dei shipara bad U Syiem Syntiew U Syiem jong ka Hima Nongkhlaw. (La sot ïa kane na ka kot “The History and Culture of the Khasi People” da u Dr. Hamlet Bareh.)

2. Halor ka jingmut ka jingai Syiemlieh lane Syiem la shem ba ki paidbah ha kito ki Raid kiba la lam khmat da ki Lyngdoh na ki jait ba khraw kiba la ïa kynduh lang bad la ïateh kular ban tang jait Syiem ïa ki ban syshar bad hiar pateng bad kiba lah ban leh ïa kane ka kam ki dei ki khun shynrang na ka kpoh ka ïing bala tang jait Syiem ba sa mih kane ka riti ai jait Syiem ha kaba Ka Syiem-Sad ne kano kano ka khadduh ne ka kmie ne hynmen kiba na kpoh Syiem ba la tang ka ban peit lut ïa baroh ka leh niam leh rukom hapoh ka Hima.

Ka jingpynïapher hapdeng ka Syiemlieh ne Syiemïong hapoh ka ka Hima Nongkhlaw ka dei beit na kito kiba synshar hapoh Hima Nongkhlaw kum ki Syiemlieh (adopted) bad kiwei pat kiba leit long nong synshar hapoh ka Hima Nongspung la khot ki Syiemïong (adopted). Ki bynta jong ka mihngi bad shathie jong ka Hima Nongkhlaw kum ka Sohiong, Mawmluh, Sohra bad Shella la synshar da ki Syiem-Shnat.

Ngi pynpaw hangne ïa ka jingshisha ba ngi dei na kajuh ka ïing bad u Tirot Sing bad ngi hiar pateng na ka kmie tymmen jong ngi ka Iawlah ne ka Lah Syiem kaba long shipara arkmie bad ka Ksan Syiem kaba dei ka kmie u Tirot Sing bad ngi don ïa kane ha ka kot Hiar pateng ka Kur Syiem Mawnai-Mawlong jong ngi. Ha ka jingïadei bad kane, ngi sngewdonkam ban kdew tang naduh katei ka pateng ba la long haneng, khlem da jer ïa ki pateng kiba la leit noh mynshuwa. Te ïa kane la pynshisha na ka kot “The History and Culture of the Khasi People”, “U Tirot Singh” da u Dr. Hamlet Bareh bad na ka kot “Ki Syiem Khasi bad Synteng” da u Dr. Homiwell Lyngdoh bad na ka kot “Succession To Syiemship In The Khasi States” da u Captain D. Herbert.

3. Haba la khie ka thma hapdeng ka sorkar phareng bad ka Hima Nongkhlaw, la don ka jingpynbeit ba lada jia ba u Tirot Sing u ïap ha ka jingïaleh, u Jidor Sing un shimti ïa ka khet syiem bad lada u Jidor Sing un ïap ha ka jingïaleh, u Rijon Sing un shim ïa ka kam syiem. ïa kane ka jingpynbeit la leh da ka Dorbar Syiem, kata kaba kynthup ïa u Syiem, ki Myntri bad ki Bakhraw lem bad ki Longsan ne ki Tymmen ki San jong ka Hima. Namar ba ym ïoh por ban lum ïa ka Dorbar Hima hapdeng ka thma, kane ka Dorbar ka la phah khubor sha palat spah tylli ki shnong kiba don hapoh ka Hima ban ïoh ïa ka jingmynjur jong ki bad ïa kata ka jingpynbeit jong ka Dorbar Syiem la mynjur da baroh ki shnong ha ka Hima kumta kane ka kdew shai ba ym shym la shu thung jubor ïa ngi hapoh ka Hima ban shim ïa ka jinglong syiem da kaba ia sngewthuh jingmut bad ka Sorkar Phareng kumba la kynthoh da u Syiem Phrester Manik Syiemlieh.

4. Hadien ba la kem ïa u Tirot Sing, ka sorkar phareng kaba la tip ïa kata ka jingpynbeit, ka la tyrwa ba u Jidor Sing un shim ïa ka khet Syiem. U Jidor Sing u la kyntait ïa kata ka jingtyrwa, namar u ong ba u Tirot Sing u dang im bad ba un ym shet kylla ïa la u jong Syiem. Hangta ka sorkar phareng ka la phai noh sha u Rijon Sing da kaba ïa kren sngewthuh bad u bad u Rijon u la shim ïa kata ka kam hynrei tang hadien khyndiat por u la iehnoh, namar ba um lah ban pynïaid bad synshar ïa ka Hima. Hangta, ka sorkar phareng ka la ïakren bad ki Myntri halor ka synshar-khadar ïa ka Hima bad ki myntri ki la phai biang sha u Jidor Sing bad dei hangne ba u Jidor Sing u la hap ban pdiang bad shim ïaka kam Syiem haduh ka sngi ka jingiap jong u. ïa kane la ban shem na ka kot “The History and Culture of the Khasi People” da u Dr. Hamlet Bareh.

5. ïa kane ka jingtip shaphang ka jinghiar-pateng jong ka jinglong Syiem hapoh ka Hima Nongkhlaw ba dei tang na ka kpoh Mawnai bad Mawlong, la buh jingthoh ruh da u Captain D. Herbert u Deputy Commissioner of the Khasi and Jaiñtia Hills, uba la leit dalade ban kylli bad tohkit shaphang ka rukom thung Syiem bad kiei kiba dei hok ban long Syiem da kaba u la thoh shai ha ka Report jong u ba dei tang na ka Kpoh Mawnai bad Mawlong kiba dei hok ban long Syiem. La shim kane na ka “Succession To Syiemship In The Khasi States” da u Captain D. Herbert (List of Connected Papers Appendix 43 –

49). .

6. Hadien kitei ki Syiem, ïa ka jingsynshar ïa ka Hima la shim bad la pynïaid da ki Acting Syiem kiba long ki Officer ba la thung da ka Khasi Hills Autonomous District Council na ka ïing Syiem Mawnai-Mawlong bad kine ki long kumne harum:

1. U KITDOR SYIEM (Kpoh Mawnai 1979 – 1983)

2. U BESTO MANIK SYIEM (Kpoh Mawnai 1984)

3. U IRAD MANIK SYIEM (Kpoh Mawlong 1986 – 1989)

4. U OSTENLOVELINE SYIEM (Kpoh Mawnai 1989 – 1995)

5. U HESSTANLEY SYIEMLIEH (Kpoh Bynther Kynshi JUNE –

AUGUST 1998)

6. U STEAMER MANIK SYIEM (Kpoh Mawlong1995 – 2005)

7. U PHRESTER MANIK SYIEMLIEH (Kpoh Bynther Kynshi

2005…..Syiem Pura)