U Nongrep u im u plung ryngkat ka Mei mariang. U rep u riang ha pneh ka meimariang. U thung kba, u thung phan bad bun jait ki kynja jhur, ki jait soh ba bun jait. U rep lyngkha ban ioh ka bam ka sa. U thung krai, u thung phankaro, shynrai bad bun jait ki symbai ba long ban bam. U nongrep u bam u dih ba ioh na ka Mei mariang. U ioh bam ki tit, ki pashor ba ioh na ka meimariang. U nongrep um ju im khlem ka meima-riang.
Ka mei mariang ka long ka dohnud jong u nongrep, khlem ka Meimariang u nongrep um ioh eiei ban pyndap pynbiang ïa ka jingim. U puh u dain bad u pynsboh ïa ka khyndew ba kan ai u soh ïa u nongrep ha baroh ki saw aiom jong u snem. U nongrep u kmen u sngewbha haba ka Mei mariang ka don ryngkat bad u, u puh pynthor kba bad u lum bun ban pynsboh ïa u jingthung. Ha lum ne ha pynthor u nongrep u tip bha kumno ban rep ban pynlong sboh ïa ka khyndew shuwa ba un bet ïa u symbai.Ka meimariang ka long ka kynrad halor u nongrep, ym u nongrep u long kynrad halor ka meimariang. Kine ki ïa ïaid ryng-kat ryngkat man ki aiom jong u snem.
U nongrep u ioh ka bam ka sa na ka pneh ka Meimariang. Ka Meimariang ka long kum ka Kmie ki lai phew jait, ki jait jingthaw kiba im hapneh ka Meimariang. Ka Mei mariang kam ju kyntait ïano ïano kiba lah ban ïa snoh kti bad ka Meimariang. Ka ai sbun mynsiem ïa u nongrep ba u plie ka lad ka lynti ba un ioh kjit dud ha ka Mei mariang. U nongrep bad ka Meimariang ki ïa ïaid ryngkat ban pynim iwei ïa iwei pat. Ka jingïadei u nongrep bad ka Meimariang ka long ym lah ban pynjngai iwei ïa iwei pat. U Nongrep u shna ïing shna sem da ki dieng ki siej ba ioh na ka Meimariang, u tbeh jingshai da u prew bad ki dongmusa ba ioh na ka Meimariang. Dei kane keiñ ba u nongrep u la ïaid ryngkat bad ka Meimariang, u nongrep u long u khun ka Meimariang.
C. B. Iawphniaw
