Shillong, Naiwieng 21
Ka Shillong Lajong FC ka la long ba la khreh na ka bynta ka lympung ïalehkai I-League 2024-25. Ka thong jong kane ka klob na ka nongbah ka long ban ïalehkai bha khnang ban kynjoh sha ka kyrdan ba ha khlieh.
Kane ka kynhun hapoh ka jingïalam u coach u Jose Hevia kan pynkhreh ïa ka jingïalehkai kaba nyngkong eh ha la ïing pyrshah ïa ka klob kaba khlaiñ bor na Goa, ka Churchill Brothers ka ban long ha ka 24 tarik mynta u bnai (Sngi U Blei) ha ka SSA Stadium kaba ha First Ground, Polo ha ka por 7 baje mynmiet.
“Hadien ka Durand Cup, kum ka kynhun ngi la ïoh ban pynkhreh bha lyngba ka jingdon ïa ki rangïalehkai kiba thymmai. Wat la ngim shym la ïoh ban ïashim bynta ha kino-kino ki lympung ïalehkai, hynrei kum ka kynhun ka la ïoh ban kilanmet ban pynkhreh ïa ka I-League,” la pynpaw u Hevia ha ki lad pathai khubor ha ka Sngi Palei.
Naduh ba ka la ïoh rung sha ka I-League, ka Shillong Lajong kam pat ju lah ban kynjoh sha ka kyrdan ba ha khlieh, hynrei ka la lah pat ban pynneh ïalade ha kane ka lympung.
“Naduh ba nga la wan shimti ha ka sien kaba ar ïa kane ka klob naduh ka Durand Cup, ka thong ka jong ngi ka long ban ïoh jingjop ha man la ki jingïakhun la ka jong shabar ne ha ïing bad ngi khmih lynti ba kane ka urlong,” u la bynrap.
Na ka liang ar ngut ki rangïalehkai kiba dei na kane ka Jylla ki la pynpaw ïa ka jingkhmih lynti ban ïalehkai bha naduh kaba sdang jong kane ka lympung namar kum ka kynhun ki don ïa kajuh ka jingmut ban kynjoh sha ka thong jong ka jingjop.
“Ngi la pynkhreh mynta kumba ar bnai eiei, te kumta ngi don ïa ka jingangnud kum ka kynhun ba ngin ïalehkai bha khnang ban rah ïa ka nam lahduh ha ka I-League mynta ka aïom. Kumba ka long mynta u snem baroh ki rangïalehkai ki long kiba biang khlem don ki jingmynsaw namar ha u snem ba la lah ki don na ki rangïalehkai ki bym pat ïa biang. Kumjuh ki rangïalehkai nabar ri ruh ki ïatrei shitom. Kumta ka jingwan ïasoh ka jong ki mynta u snem kan ïarap ïa ka kynhun ban poi sha ka thong,” la pynpaw u Hardycliff Nongbri.
Ha kawei pat ka liang uwei pat u rangïalehkai uba la ïohpdiang dangshen ïa ka khusnam Kiang Nangbah, u Phrangki Buam u la kyntu ïa ki paidbah ba kin wan ban ai jingkyrshan ïa kane ka klob. “Kumba phi la wan ban ai jingkyrshan ïa ngi ha ka Durand Cup, kumta ngi kyntu biang sa shisien pat ïa phi baroh ki paidbah ba phin wan ban ai jingkyrshan biang ïa ngi ha ka I-League khnang ba ngin lah kynjoh sha ka thong jong ka jingjop.
Na ka bynta katei ka jingïakhun kaba nyng-kong ha la ïing, ka Shillong Lajong ka la pynbna paidbah ba kan sdang ban die noh ïa ki tiket naduh ka Sngi Thohdieng. Ki dor jong ki tiket ki long T.150, T.250 bad T.500. Ïa kine ki tiket lah ban ïoh na Electronic Centre (Police Bazaar), Cafe Shillong (Laitumkhrah) bad na SSA Stadium Ticket Counter.
