Khliehriat, Naiwieng 21
Ka Rymbai Shkenshynriah SC bad Sutnga SSCC ki la ïoh jingjop ha ka Super Division Football Tournament (4th Kyrmen Shylla Contribution Trophy) ba la pynïaid da ka East Jaiñtia Hills District Football Association (EJHDFA) ha madan EJDSA Artificial Turf, Diengshynrum ha ka Sngi Palei.
Ha ka jingïalehkai kaba nyngkong ka Rymbai Shkenshynriah ka la pynliem da 2-0 kol ïa ka Ladrymbai B SC. Ïa kine la thep da u Mardiphon Rymbai ha ka minit kaba 13 bad u Ïaishah Bareh (61).
Ha ka jingïalehkai kaba bud, ka Sutnga SSCC ka la pynliem ïa ka Rymbai Iawpynsing SC da 3-1 kol. Ïa ki kol jong ka Sutnga la thep da u Lalrem Kung Hmar (24 & 52) bad u Raplangki Lyngdoh (90+5), katba ka shi kol jong ka Rymbai Ïawpynsing la thep da u Sixkiru Lyngdoh (90+1).
Ha ka Sngi Thohdieng ka jingïalehkai kan long hapdeng ka Dhana SC bad Khliehriat West YWSC ha ka por 11:45 baje mynstep, katba ka Chiehruphi ïa ka Thangskai Tiger ha ka por 2 baje nohphai sngi.
