Khliehriat, Naiwieng 22
Ka Dhana CSC bad Thangskai Tiger SC ki la ïoh jingjop ha ka Super Division Football Tournament (4th Kyrmen Shylla Contribution Trophy) ba la pynïaid da ka East Jaiñtia Hills District Football Association (EJHDFA) ha ka Sngi Thohdieng ha madan EJDSA Artificial Deinshynrum.
Ha ka jingïalehkai kaba nyngkong ka Dhana SC ka la pynliem ïa ka Khliehriat West da 2-0 kol. Ïa kine kol la thep da u Phon Khaii ha ka minit kaba 13 bad Marki Swer (26).
Ha ka jingïalehkai kaba bud, ka Thangskai Tiger SC ka la pynliem ïa ka Chiehruphi SYWSC da 3-2 kol. Ïa ki kol jong ka Chiehruphi la ïarap pynthep da u rangïalehkai ka liang pyrshah u Mankhih Rymbai ha ka minit kaba 18 bad Sandi Kasar (29) lyngba ka penalty, katba ïa ki kol jong ka Thangskai Tiger la thep da u Pynthymme Rymbai (22 &25) lyngba ka penalty bad u Verdy Nongtdu (90+1).
Ha ka 25 tarik ka jingïalehkai kan long hadpeng ka Sutnga SSCC pyrshah ïa ka Khliehriat West YWSC ha ka por 11:45 mynstep, katba ka Rymbai Iawpynsing ïa ka Dhana SC ha ka por 2:15 baje nohphai sngi.
