Shillong, Naiwieng 22
Ka Organising Committee jong ka 6th Meghalaya Games ka lah ban pyn-kynriah ïa ka jingïalehkai jngi na Jowai sha ka nongbah Shillong na ka daw ka jingbym thikna ban lah pyndep ha ka por kaba biang ïa ka pung jngi kaba la thmu ban tei ha Kiang Nangbah College kaba ha West Jaiñtia Hills.
Kat kum ki khubor la ong ba kane ka jingtei ïa ka pung jngi ha Jowai ka lah ban shim por bad yn ym lah ban pyndep ha ka por kaba biang.
Kumba ka paw kane ka jingpynkhreh na ka bynta kane ka lympung ka ban long ha Jowai bad Wahïajer, West Jaiñtia Hills kan sa sdang ban ïaid shaphrang bad ïa mynta ka Sorkar Jylla ka dangap ïa ka por ban sdang noh ïa baroh ki jingmaramot ïa ki skul bad kolej mar ïa kut ki eksamin.
Ha kawei pat ka liang u MLA ka Jowai, Bah Wailadmiki Shylla haba ïakren dangshen bad ki nongthoh khubor u la ïathuh ba ka jingtei ïa ka pung jngi ha Kiang Nangbah College ka la sdang, katba ki jingmaramot pynbha na ka bynta ki community hall, ki skul bad kolej yn sa sdang noh shen. “Ïa mynta ngi dangap ban sa kut ki eksamin jong baroh ki skul bad kumjuh ki kolej khnang ban sdang noh ïa ka jingmaramot namar ngi la dep ban pynbiang lypa ïa ki tender.”
U Bah Wailadmiki u la pynpaw ba ka jingwan ka Meghalaya Games ha West Jaiñtia ka la wanrah bun ki jingkylla khamtam haba ïadei bad ki jaka ïalehkai. “Ngi sngewkmen ba ka jingwan ka Meghalaya Games kan wanrah ka jingkylla ïa ka thaiñ hi baroh kawei ha ka jingdon ki jaka ïalehkai namar ka pung jngi ka dei kaba ngim pat ju ïoh ha ka district jong ngi, kumjuh ha ka ïoh ka kot bad kiwei kiwei.”
Ha kane ka lympung yn wan shim bynta palat 3800 ngut ki nongïalehkai ki ban wan na kylleng ki district jong ka Jylla bad da ki spah ngut ki nongpynïaid.
Ha kaba ïadei bad ki jaka sah na ka bynta ki nongïalehkai bad ki nongpynïaid, u Bah Shylla u la pynpaw ba ki la biang nadong-shadong namar yn sa pynkhreh ïa ki skul na ka bynta ki nongïalehkai katba ïa ki hotel bad ki guess house yn pynbiang na ka bynta ki nongpynïaid.
