Shillong, Naiwieng 24
Ka Tottenham ka la pynshaïong da kaba pynliem kput ïa ka Manchester City haduh 4-0 kol ha Etihad Stadium. Kane ka la pynkyndit ïa ka Man City kaba dei ka lahduh jong ka aïom ba la dep kaba la ju ïai bteng jingjop haduh 52 sien ha la ïing, ban mad noh ïa ka jingshah rem ha ka Sngi Saitjaiñ.
Ha ka kylla step u James Maddison u la lah ban thep ar kol tang hapdeng ki hynñiew minit, nangta sa ar kol kaba la thep da u Pedro Porro bad Brennan Johnson ban pynlong ïa katei ka kynhun ban ïoh jingjop.
Kane ka jingshah rem, kaba dei ka sien kaba nyngkong jong ka City ha la ïing naduh ka jingïalehkai kaba nyngkong ha u 2022, kaba la pynlong ïa ka ban shah tam ha ka Liverpool, kaba la bat ïa ka kyrdan ba hakhlieh ha ka Premier League da kaba tam phra poiñ.
Kane ka jingjop ka la pynlong ïa ka Tottenham hapoh ka jingïalam u Ange Postecoglou ban don ha ka kyrdan ba hynriew.
Wat la dangshen u la pynjlan ïa ka jingïateh kular haduh u snem 2027, hynrei u Pep Guardiola u ïakynduh ïa ka jingeh ban weng ïa ka jingïalehkai kaba sniew tam ka kynhun jong u.
Ka jingkhmih lynti ban pynkhie im biang ïa ki jingjop ba saw sien lynter jong ka Premier League hadien ka jingïateh kular thymmai jong u Guardiola kam shym la urlong satia.
Ha shwa ban sdang ka jingïakhun, u Rodri u la pyni ïa ka trophy Ballon d’Or jong u sha ki nongkyrshan, ha kaba ka kyrteng jong u ka la paw ha kylleng ka madan jong ka Etihad. Utei u rangïalehkai shapdeng jong ka Spain, 28 snem ka rta, u la duh ïalehkai na ka jingmynsaw ka khohsiew naduh u Nailur, bad ka jingbym don jong u, ka la ktah jur ïa ka rukom ïalehkai ka City.
