Amlarem, Naiwieng 24
Ka Lumpyngngad, Mawlong SC bad ka SCC Samanong ki la ïoh ïa ka jingjop ha ka Super Division bad Lower Division Football Tournament ba la pynïaid da ka Amlarem Sub Divisional Sports Association (ASSA) ha ka Sngi Saitjaiñ ha madan Mini Stadium Ladjaplem, Amlarem.
Ha ka jingïakhun jong ka Super Division, ka Lumpyngngad ka la pynliem ïa ka Jarain da 1-0 kol bad kane ka la wan urlong lyngba u Da O Syieh uba la thep ha ka minit kaba 69.
Ha ka jingïakhun jong ka Lower Division hapdeng ka EYC Amjalong bad FYSC Amtapoh ki la ïasam mar shi poiñ hadien ba ki la ïakhaid mar 1-1 kol.
Ka FYSC Amtapoh ka la ïoh ban pynkhih jar ha ka minit kaba 2 lyngba u Rijanki Manner, hynrei hadien 8 minit ka EYC Amjalong ka la lah ban pynïakhaid kylla lyng-ba u Jovian Lynthong.
Ha ka jingïalehkai kaba bud, ka Mawlong SC ka la pynliem ïa ka Syntong Walfare da 2-1 kol. Ka Syntong Walfare ka la ïoh ban thep kol nyngkong ha ka minit kaba 3 lyngba Kampher Langshiang, hynei ka Mawlong SC ka la lah ban pynphai kylla ar kol lyngba u Synchetmon Lamat, uba la thep ha ka minit kaba 13 bad kawei pat da u Samuel Lamat ha ka minit 42.
Ha kawei pat ka jingïalehkai ka SCC Samanong ka la pynliem noh ïa ka Ïaikyntiew SC da 3-0. Ïa kine kol la thep da u Michel Mynsong ha ka minit 6, kumjuh u Pheri Bareh (32) bad u Miros Bareh (57).
