Saipung, Naiwieng 24
U Rahul Bareh u la ïoh ïa ka hat-trick na ka bynta ban pynlong ïa ka Pyrdung SC ban jop kput da 6-0 kol pyrshah ïa ka Mulait Bri Sumer ha ka lympung ïalehkai Super Division Football Tournament ba la pynïaid da ka Saipung Block Sports Association (SBSA) ha ka Sngi Saitjañ ha madan Lamyrsiang.
Ha katei ka jingïakhun u Rahul Bareh uba dei u rangïalehkai ka Pyrdung, u la ïoh ban thep lai kol ha ka minit 14, 27 & 35, kumjuh u Phrangsngi Pakem u la thep ar kol ha ka minit 17 & 42 bad ïa kawei pat la thep da u Ker Syrti ha ka minit kaba 39.
Haba phai sha kawei pat ka jingïalehkai kaba bud, ka Mulait United SC ka la pynliem ïa ka Jalaphet Bri Sumer da 2-1. Ïa ki kol jong ka Mulait United la thep da u Rungsing Muingo ha ka minit kaba 22 bad Arki Bareh ha ka minit 77. Hynrei ka Jalaphet Bri Sumer ka la lah ban pynphai kylla lyngba ka penalty ba la shut da u Das Dkhar ha ka minit 82 ha shwa ba kan shah rem.
Kane ka lympung kan bteng biang ha ka Lah Sngi U Blei ha kaba ka Narwan SC kan ïakhun pyrshah ïa ka Shnongrim SC ha ka por 11:30 baje mynstep, katba ka Tluh SC ïa ka Pyrdung SC ha ka por 1:30 baje nohphai sngi.
