Shillong, Naiwieng 25
Ki dkhot ka Adhoc Com-mittee jong ka Indian Olym pic Association (IOA) na ka bynta ka Tripura, ki la poi ha Agartala ha ka Sngi U Blei na ka bynta ka jingleit jngoh ar sngi ban weng ïa ki jingeh hadien ba la mih ki kynrum-kynram hapoh ka Tripura State Olympic Association (TSOA).
Ïa kane ka komiti la ïalam da u Bah John F. Kharshiing, Working Pre-sident ka Meghalaya State Olympic Association (MSOA) bad Chairman jong ka IOA Adhoc Com-mittee-Tripura ryngkat kiwei pat ki dkhot kiba kynthup ïa u Bamang Tago, Secretary General ka Arunachal Pradesh Olympic Association (APOA), bad u Robert R. Royte uba dei u President jong ka Mizoram Olympic Association.
Ïa ka jingthaw jong ka Adhoc Committee la pynbna ha kaba sdang jong une u bnai ha ka 8 tarik da ka Dr. P.T. Usha, President ka Indian Olympic Association (IOA), lyngba ka hukum ba la pynmih da ka sorkar. Ïa kane ka komiti la thaw na ka bynta ban weng bad pynbeit ïa ki jingeh hapoh ka TSOA, ban pynthikna ba ki nongïalehkai bad ki synjuk ïalehkai ha kylleng katei ka jylla kin ïoh ïa ka jingkyrshan bad ka jingmihkhmat kaba ki dei hok ban ïoh.
Ka kamram ba kong-san jong ka IOA Adhoc Committee ka long ban ïamir jingmut bad kiba bun ki nongshim bynta, kynthup ïa ki nongkitkam jong ka TSOA, ki seng ïalehkai jong ki jylla, ki nongïalehkai, ki coach, bad ki heh na ka tnad Samla bad ïalehkai, Tripura.
Kum shi bynta jong ka mat ïakren, ka komiti ka la buh por ban bishar bniah ha ka 25 bad 26 tarik mynta u bnai ïa palat 40 tylli ki synjuk ïalehkai jong katei ka jylla. La ïathuh ba kine ki seng ki la ïakynduh ïa ki jingeh kiba bun ha kine ki snem. Mynta u Secre-tary General ka TSOA u la rieh tngen la hynriew bnai namar ka jingmudui kaba dang ïaid shakhmat bad ki jingeh ha ka liang ka aiñ, ha kaba la ïathuh ba ki pulit ki dang peitngor ïa u.
Ka IOA Adhoc Committee-Tripura, hadien ba ka la bishar bniah ïa ka jinglong jingman ha Agartala, kan sa ai ïa ka kaiphod sha ka President ka Indian Olympic Association (IOA) ryngkat bad ki jingai jingmut ba kyrpang khnang ba ki samla kin lah ban ïashim bynta ha ka National Games ban wan bad lah ruh ban phah ïa ki samla don sap sha ki jingïakop jong ka ri na ka bynta ki nongïalehkai bashisha kiba la shah pynduh ïalehkai noh la palat 12 snem.
