Beirut, Naiwieng:
Katkum ki khubor la ong ba ka jingiakynad hapdeng ka Israel bad ka Hezbollah ka nang iai bteng bad jur shuh shuh ha ka Sngi U Blei, ha kaba ka Israel ka la leit thombor ia ka ktem ki lehnoh Hezbollah kaba don sha ka phang Shatei jong ka Beirut, katba ki lad pathai khubor jong ka Lebanon ki iathuh ba ka jing-iakhun ka la jur bha ha katei ka thaiñ khappud. Kum ka jubab, ka Hezbollah ruh kaba la ioh jingkyrshan na ka Iran, ka la ther palat 250 tylli ki ‘namding bad kiwei-kiwei ki bom sha Israel ha kawei na ki jingiakhun kaba jur tam jong katei ka kynhun lehnoh ha kane ka kynti.
Wat la katta, la ong ba ka tnat ïada suiñ jong ka Israel, ka la lah ban khanglad ia katto katne ki ‘namding kiba leit poi sha Israel bad kiba la siat da ki lehnoh Hezbollah ha katei ka sngi, hynrei la don ruh ki ‘namding kiba ka Israel kam lah shuh ban kyrda bad kiba la ioh ban pynjulor ia ki iing ki sem kiba don ha ki phang pdeng jong ka Israel.
Katkum ka jingpynbna khubor jong ka Hezbollah ha katei ka sngi, ka la iathuh ba ha kane ka sien, ka la pynhiar kput da kaba tyngeh ia ka Israel, da kaba pyndonkam ruh ia ka kynhun jong ki drone hiar thma ha ka jaka sah jong ki shipai duriaw jong ka Ashdod, ka thaiñ shatei jong ka Israel.
Kumjuh na ka liang ka tnat shipai Israel, ka la pyntikna ba ka Hezbollah ka la siat kumba 250 tylli ki ‘namding bad kaba long ruh ka jingleit thombor ba shyrkhei tam ba ka Hezbollah kam pat ju pyni baroh shi katta bnai ba iakynad bad ka Israel.
Ha kajuh ka por ha Lebanon, ka Israel ka la hiar thma ia ki jaka Shathie jong ka nongbah ba don ka jaka treikam ba heh duh jong ka Hezbollah, shisngi hadien ka jinghiar thma jong ka Israel, kaba ka tnat ka koit ka khiah, ka la iathuh ba ka la shim ia ka jingim jong 84 ngut ki paidbah ha katei ka jingjia.
