Mexico City, Naiwieng:
Katkum ki khubor, la ong ba 6 ngut ki la khlad noh bad 10 ngut pat ki la mynsaw na ka jingjia thombor ha kawei ka jaka leh kmen ‘Bar’ ha ka Sngi U Blei hapoh ka nongbah Villahermosa, kaba don sha ka phang Shathie-mih-ngi jong ka Mexico.
La ong ba uwei u ‘riew kieng-atiar u la leit rung sha katei ka jaka leh kmen ban wad beit thik tang ia uwei u briew kumjuh ban synreit kuli, hynrei u kuli u la leit dei pat ia kiwei kiba don lang ha katei ka jaka.
5 ngut napdeng kitei kiba khlad, ki dei kiba la khlad noh hashen namar ki jingmynsaw ba la jur. Katba utei uwei pat u la khlad noh hapdeng ka jingsumar hadien ba la pynpoi ia u sha jakasumar.
Ia 5 ngut na kitei kiba mynsaw la dep ban pynithuh hynrei ym shym pat pynpaw kyrteng ia ki.
Kane ka jingsynreit kuli ka long tang hadien 2 taiew jong kajuh hi ka jingjia kaba kum kane hapoh ka nongbah Queretaro, ha ka phang pdeng jong ka Mexico.
Ka tnat Federal Public Security Secretary ha ka Sngi U Blei ka la pyntip ba ka sorkar Mexico ka dang iatrei lang bad ki bor pynïaid shnong jong katei ka thaiñ ban lap ia kaei kaba la jia ha Tabasco ha katei ka sngi.
