Sydney, Naiwieng:
Ki trai jong ka Facebook & Google kiba long ki tnat jong ka rynsan Meta, ha ka Sngi Ba-ar ki la kyntu ia ka Sorkar Australia ba kan pynsangeh treikam shuwa ia ka aiñ rew (bill) kaba la rai ban khang bad pyrkhing noh ia ki khynnah hapoh 16 snem ka rta na ki rynsan ‘Social Media’ namar la ong ba ka rynsan Social Media kan sa shah ktah jur lada pyntreikam ia katei ka aiñ. Kumta ka donkam ia ka por ba kan leh ia kane ka kam ym ban shu rai kyrkieh ne pyntreikam kyrkieh ia kitei ki kyndon aiñ ba la wanrah da ka sorkar Australia ha kane ka por.
Namar la ong ba u Myntri Rangbahduh ka Australia, u Anthony Albanese u kwah ban pyntreikam noh shen ia katei ka aiñ rew ba la wanrah da ka sorkar jong u, kum shi bynta ban tehlakam ia ki jingeh bad jingma kiba khraw ba ki khynnah- samla jong ka ri ki la shah ktah ha kine ki sngi lyngba jong kitei ki rynsan ‘Social Media’.
Ia kane ka aiñ rew la wanrah bad tyrwa hapoh ka iingdorbar thaw aiñ jong ka Australia mynshem taiew bad utei u nongialam ka Australia u la ai por tang shi sngi ba ki briew bad ki heh jong ki tnat bapher-bapher kin phylliew jingmut haba iadei bad ka jingpyrshah lane ka jingkyrshan haba iadei bad katei ka aiñ kaba u thmu ban pyntreikam noh hapoh ka ri.
