Amlarem, Naiwieng 27
Ka Dongwah Mupyut, Kharkhana bad Pdengkseh SC ki la ïoh jingjop, katba ka Tympang Club bad Pdengshakap ki la ïakhaid ha ka jingïalehkai jong ka Upper Division bad Lower Division Football Tournament ba la pynïaid da ka Amlarem Sub Divisional Sports Association (ASSA) ha ka Sngi Balang ha Mini Stadium Ladjaplem, Amlarem.
Ha ka jingïalehkai jong ka Upper Division, hapdeng ka Psadwar Senglang bad TC Pdengshakap ki la ïasam mar shi point hadien ba ki la ïakhaid mar 1-1 kol. Ïa ka kol jong ka Pdengshakap la thep da Bamenri Suchen ha ka minit kaba 22, hynrei ka Psadwar Senglang ka la lah ban pynphai kylla lyngba u Jied Pohplet (40).
Haba phai sha ka jingïalehkai jong ka Lower Division, ka Dongwah Mupyut ka la pynliem ïa ka War Jaiñtia Veteran da 2-0 kol. Ïa kine la thep da u Chemphang Phawa ha ka minit kaba 3 bad u Army Phawa (8).
Ha ka jingïalehkai kaba bud, ka Kharkhana ka la pynliem ïa ka Lumkyntur United da 2-0 kol bad ïa kine ki kol la thep da u Eplanmidaman Shylla ha ka minit kaba 4 bad Dishai Pohrmen (45).
Ha kawei pat ka jingïakhun kaba khatduh jong kane ka sngi, ka Pdengkseh SC ka la pynliem noh ïa ka Amlanai lyngba ka shi kol ba la thep da u Kynsai Muksor.
