Islamabad, Naiwieng:
Ka PTI kaba dei ka seng liang pyrshah jong u Myntri Rangbahduh barim ka Pakistan, Imran Khan, ka la pynkut noh ïa ka jingïakhih ha ka nongbah Islamabad ha ka Sngi Balang, hadien ba ka sorkar Pakistan ka la phah kem ïa ki spah ngut ki nongkyrshan jong katei ka seng namar ka jingkulmar kaba la mih hapdeng ki nongkyrshan jong utei u nongialam bad ki bor pahara kiba dang pyrshang ban tehlakam ia ka jingleit tur ki paidbah sha katei ka jaka. Ha kane ka jingjia 4 ngut ki bor pahara ki la khlad noh hapdeng ka jing-iakynad bad ki paidbah nongiakhih ha ki khyndiat sngi ba la leit.
Kumta hadien jong katei ka jingjia, ki bor ka aiñ jong ka ri Pakistan ki la phah ia ki bor pahara sha katei ka jaka bad ki la pyntreikam ruh da ka aiñ ban shu siat beit noh ia kat kiba leit tur bad kiba leh pyrshah ia ka jingpyrkhing. Da kaba hukum kumne la lah ban pynthylli bad pynjai-jai ia katei ka jaka iakhih kaba la khihwin ha kitei ki sngi. Ki nongialam ba hakhlieh jong katei ka seng kiba kynthup ia ka kurim jong u Imran ka Bushra Bibi bad u Ali Amin Gandapur kiba lam khmat ia katei ka jingiakhih, ki la phet krad noh na katei ka jaka hadien ba la sakhi ia katei ka jingiaumsnam kaba shyrkhei haduh saw ngut ki bor pahara bad uwei u riew paidbah, ki la duh ei ia ka jingim hapdeng katei ka jingiakhih paidbah shi sngi.
Namarkata, la ong ba ha kane ka kynti, ka seng Pakistan Tehreek-e-Insaf, ka la pynsangeh noh ia katei ka jing-iakhih hadien ba ka sorkar ka la shim da ki kyndon kiba tyngeh, la ong u Atif Khan, nongthaw aiñ jong ka PTI.
Ka jingiakhih kaba la sdang ha ka Sngi U Blei ka la shim ia ka jingim jong hynriew ngut ki ‘riew paidbah kynthup ia saw ngut ki bor pahara bad ka la pynkhihwin ia katei ka ri ha ka Sngi Ba-ar. Da ki hajar ngut ki nongkyrshan jong u Khan ki la pynkheiñ ïa ki jingkhang surok bad ki la ïakhun bad ki pulit ha kine ki ar sngi ba la dep ban ïalum lang ha Islamabad, da kaba pyrshah ïa ki jingpyrshang jong ka sorkar jong u Myntri Rangbahduh ka ri Shehbaz Sharif ban khanglad ïa ki ban rung sha ka nongbah.
Ki nongiakhih ki la ia lum lang hajan ka jaka ba ki khot ka Red Zone ha ka Sngi Thohdieng bad ka seng ka la pynbna ban pynlong ia ka jingshong kyllain myngor haduh ba ka sorkar kan pdiang ia ka jingdawa jong ki ban pyllait noh ia u Khan na patok. Utei u khlur ialehkai kriket barim u la iakynduh palat 150 tylli ki mukotduma naduh ka jingbamsap haduh ka jingpyndonkam bakla ia ka bor mynba u dang long u Myntri Rangbahduh kumba saw snem haduh u snem 2022.
Ka jingkhynra ka dang ïaid shakhmat bad la kem ïa kiba bun ngut ki nongïakhih kiba la sdang ïa ka jingïashong kyllain myngor ha Islamabad ban dawa pyllait noh ïa u Khan na patok, ong u Myntri ka tnad pathai khubor u Attaullah Tarar haba iakren bad ki nongthoh khubor ha ka Sngi Balang.
