Shillong, Naiwieng 27
Ka ‘thei rahnar jong ka ri India kaba la khur takma rnong ha ka Tokyo Olympic, ka Mirabai Chanu, kan duh ïashim bynta ha ka jingïakop rahnar jong ka Weightlifting World Championships ka ban long ha ka taïew ban wan ha Manama, Bahrain, namar ba ka dang ïai bteng ban shah sumar.
Kane ka nongïalehkai kaba la 30 snem ka rta kam shym la ïashim bynta satia naduh ba ka la wan ha ka kyrdan basaw ha ka kyrdan ïalehkai 49 kilo jong ki kynthei ha ka Paris Olympics ha u Nailar mynta u snem.
Namar ka jingbymdon jong ka Chanu, ka Gyaneshwari Yadav kan mihkhmat ïa ka jingïakhun jong ka India ha ka World Championship, ka ban sdang naduh ka 6 tarik u Nohprah ha ka kyrdan ïalehkai 49 kilo.
Ka Bindyarani Devi (55 kilo) kaba la khur takma rupa ha ka Commonwealth Games bad hapoh ka ri (national championship) bad ka Ditimoni Sonowal (64 kilo) kaba la khur takma ksiar ha ka Khelo India Weightlifting League ka Ditimoni Sonowal (64 kilo) ki dei kiwei pat ar ngut ki nongïalehkai ka India ki ban ïakhun ha kane ka lympung.
