Shillong, Naiwieng 28
Ka Meghalaya ka la lah ban hap lut baroh ki wiket hadien ba ka la ïoh 178 ron ha ka pali tied kaba nyngkong jong ka jingïakhun U-19 men’s Cooch Behar Trophy 2024-25 Elite Group A pyrshah ïa ka Baroda kaba la sdang ha ka Sngi Palei jong ka taïew ha madan ïalehkai jong ka MCA, ha Polo.
Ka Baroda ka la wan poi ha nongbah Shillong na ka bynta kane ka lympung ïalehkai hadien ba ka la jop baroh lai tylli ki jingïakhun ba la dep. Tad haduh ba kut jong ka sngi nyngkong, ka la lah ban ïoh 55 ron khlem pat hap wat tang uwei ruh wiket.
Haba phai sha kane ka jingïakhun, kaba la jop ïa ka jingkynting pisa (toss), ka la kam trai ban tied nyngkong ha kaba kam shym la ïoh ïa ka jingsdang kaba paka na la ki nongtied (batsman) sha khmat, pynban dei ki nongtied ba kham shadien kiba la ïalehkai bha.
Ki lai ngut ki nongtied kiba la lah ban ïalehkai bha bad ban synñiang sha u sup u thiar kamai ron ïa ka Meghalaya ka kynthup ïa u ‘rang kawang bol ka kynhun u Shavian Blah (52 ron na ki 57 bol) u Angkit Tamang (33 ron na ki 111 bol) bad u Ashish Kumar Lohar (25 ron na ki 35 bol), ki la lah ban pynpoi ïa la ka kynhun sha ka thong kamai ron kaba kham don burom.
Ha ka jingshisha, u Shubham Rasaily bad Manthan Dey ki la lah ban dem hi khui na kaba sdang jong ka jingïakhun ha kaba kine baroh ar ngut ki la pynleit jingmut bha ïa ka jinglong jingman ka madan ha baroh ki 10 over ba la bol da ka kynhun ïalehkai ka Baroda.
Hynrei ym slem hadien kane, ki wiket ka Meghalaya ki la sdang ban hap kynsan uwei hadien uwei tad haduh ka khep ba wan ban mih madan u Kshitij Singhania uba la ïeng ïakhun tyngeh bad ban ïoh 22 ron ba la wan na ki 48 tylli ki bol.
Na ka liang ki nong kawang bol jong ka Baroda, u Pavan Patel u la lam khmat ïa la ka kynhun ban shim 4 wiket na ka bynta 58 ron na ki 23 over.
Haba la wan ban sdang pat ïa la ka jong ka pali tied ba nyngkong, ki ar ngut ki nongtied ka Baroda kiba dang lah ban ïai neh hapdeng ka madan ïakhun ki long u Nitya J Pandya (40 na ki 57 tylli ki bol ) bad u Smit Rathva (13 ron na ki 39 tylli ki bol).
