Nongstoiñ,Naiwieng 29
Ka kynhun ïalehkai jong ka District Police West Khasi Hills District bad ka Health Department ki la rung sha ka final jong ka lympung ïalehkai ba la tip kum ka 1st Inter Office Futsal Tournament 2024 ba la pynïaid da ka Futsal Association of West Khasi Hills District.
Ka jingïoh ban rung katei ka kynhun jong ka Health Department ka la wan hadien ba ka la pynliem noh da 3-0 kol ïa ka DC Office ha ka jingïakhun semi final kaba la long ha ka sngi Thohdieng ha Leonel Futsal Arena, Pyndengrei. Katba ka District Police West Khasi Hills ka la lah ban pynliem noh ïa ka MEPDCL lyngba ka tie-breaker da 1-0 kol hadien ka jingïakhaid da mar shikol haduh kaba kut ka jingïalehkai.
Ha ka jingïalehkai semi final jong ki kynthei pat ka kynhun ïalehkai jong ka Health Depart-ment ka la khur ïa ka jingjop hadien ba ka la pynliem noh da 5-0 kol ïa ka kynhun ïalehkai jong ka Foresters. Te kumta ka Health Department ka la ïoh rung sha ka final bad ïakhun pyrshah ïa ka kynhun ialehkai jong ka ICDS.
