Washington, Nohprah:
Ka sorkar jong u Biden ha ka Lah Sngi U Blei ka la pyntip sha ka Congress ïa ka rai ban mynjur die ïa ki tiar liengsuiñ MH-60R Multi-Mission sha ka India ha ka jinglut kaba la antad kumba USD1.17 billion.
Kumta ka tnat Defence Security Cooperation Agency ha katei ka sngi ka la ong ba kane ka jingthmu ban die ia kitei ki tiar liengsuiñ kan pynbha ïa ka jinglah jong ka India ban khanglad ïa ki jingma kiba mynta bad ki ban sa wan da kaba kyntiew ïa ka jinglah jong ka ban ïakhun pyrshah ïa ki liengsuiñ.
Ka jingmynjur jong ka sorkar u Biden ban die ïa kitei ki tiar ïada ri kiba kongsan sha ka India ha kane ka sien ka la long ruh tang ha shwa ki khyndiat taiew ba un pyndep noh ia ka samoi treikam saw snem jong u.
Kum ban shu kdew, u President ban sa long jong ka America, u Donald Trump, un bam smai kum u president ba 47 ha ka 20 tarik Kyllalyngkot 2025.
Katkum ka jingpynbna, la ong ba ka India ka la pan thied 30 tylli ki Multifunctional Information Distribution System-Joint Tactical Radio Systems (MIDS-JTRS).
Ka la kynthup ruh ia ki rukom pynkylla ia ki data kiba kham tbit; ki tank umphniang kiba shabar; Ki kor kiba peit sha khmat (FLIR); u nongiarap jong ka jingpyniaid ia ka mashin; ki jingbuh jingsat; ka jingpule ia ki jaka, ka jingshna dur, ka jingshna bad jingkyrshan; ki tiar kyrshan bad test; ki tiar ialeh; bad ka jingpyniasoh bad ka jingkyrshan test.
Ki kompeni ba kongsan ki ban iatrei lang bad ka sorkar India kumjuh bad ka tnat ïada ri jong ka India haba iadei bad kane ka kam ki kynthup ia ka Lockheed Martin Rotary bad ka Mission Systems.
Ban pyntreikam ia kane ka jingdie, kan donkam ia ka jingleit jingwan jong haduh 20 ngut ki nongmihkhmat jong ka Sorkar US lane haduh 25 ngut ki nongmihkhmat jong ki kontraktor sha India ha ka rukom ba shipor na ka bynta ban pyntikna ia ka jingiabeit bad ka jing iamynjur haba iadei bad kane ka jingiatrei lang khamtam eh haba iadei bad kane ka kam khaii- pateng jong kine ar tylli ri.
