Washington, Nohprah:
Ka America ha ka Lah Sngi U Blei ka la pynbna ia ka song jingiarap bathymmai sha ka tnat shipai Ukraine kaba $725 million na ka bynta ka Ukraine kaba kynthup ia ki ‘Landmines’ bad ruh ki tiar ïada na suin bad ki tiar ïakhun na suiñ.
Kumta la ong ba ka sorkar jong u President ka America, Joe Biden, ka la ialeh katba lah ban theh da ki klur tyngka sha ka Ukraine shwa ba u President ba la jied da ka US, u Donald Trump, un shimti noh ia ka shuki President lashem snem.
Kumjuh na ka liang u Symbud Myntri ki kam bar ri jong ka US, u Antony Blinken u la ong ha ka jingpynbna ba katei ka song jingiarap ka long shi bynta jong ki jingpyrshang ban pynthikna ba ka Ukraine ka don ïa ka bor ban ïada ïalade na ka jingleit thombor jong ka Russia.
U Blinken u la pynbna ruh ba katei ka song jingïarap kan kynthup ruh ia ki bom kawang kti, ki tiar siat na ka bynta ki tiar siat roket ba paka jong ka HIMARS, ki namding Stinger, ki tiar ialeh pyrshah ia ki drone bad ki tiar ïada ia ki tiar siat.
Ka America ka la pynbna ban phah nyngkong eh ïa ki bom khyndew sha Ukraine ha u bnai ba la dep bad kaba la wanrah ruh ia ka jing pynrem jur da ki kynhun ïada ïa ka hok longbriew manbriew.
U myntri kam poh ïing jong ka US pat, u Lloyd Austin, u la ong ba katei ka rai ka long kaba kongsan namar ki shipai Russia ki la leit tur ruh na ryngkew bad nalor suiñ bad kumta ka Ukraine ka donkam ban ïada ialade hynrei khlem ka jingkyrshan jong ka US bad ki para marjan ri, ka Ukraine kan ym lah da lei-lei ruh ban tehlakam ia ki kam thombor jong ka Russia.
Namar la ong ruh ba ka sorkar jong u Biden ka la pyrshang ban thaw lad- thaw lynti kumno ba kan ioh ban ai ka jingïarap bad ka jingkyrshan kaba biang tam naka bynta ka Ukraine ha shwa ba u President u ban sa long jong ka US- u Donald Trump, un shimti hi noh ia ka shuki nongialam jong ka US ha u Kyllalyngkot jong une u snem 2025 ban wan. Ha kajuh ka por ruh u Trump u la byrngem lypa ba un nym ai jingkyrshan shuh ia ka Ukraine namar um kwah ba ka thma jong ka Russia kan dang heh ne pur shuh-shuh bad kane ka jingkren jong u Trump ka la pynsyier ia ka Europe bad khamtam eh ia ka Ukraine kaba ju ap khmih lynti ia ka jingkyrshan na ka US.
Kumba la iohi ba ka US naduh ba sdang hi jong ka jingleit hiar thma ka Russia pyrshah ia ka Ukraine, ka la theh ia ki jingiarap bad ki song jingiarap sha ka Ukraine khnang ba ka Ukraine kan ioh ban pynbit- pynbiang ialade hapdeng ka jingiakhun bad ka Russia.
