Imphal, Nohprah:
Ki pulit ka Manipur ki la kem ïa saw ngut ki dkhot jong ka kynhun ba la shah ñiew beaiñ jong ka Kangleipak Communist Party (Peoples’ War Group) na Kakching distrik.
Kine ki briew ki la shah kem namar ka jingkynnoh ba ki donkti ha ka jingdawa pisa bad ka jingpyndonkam beaiñ ïa ki tiar siat, la ïathuh ka tyllong khubor hynnin ka sngi, ka 4 tarik, Nohprah. Ïa kine ki briew la ïohkem na ka thaiñ Lamkhai jong ka Kakching distrik.
Ïa kine ki briew kiba la shahkem la tip kyrteng kum u Sandham Premkumar Singh ba la tip ruh da ka kyrteng kum u Leikai (45), u Saikhom Sidan Singh (33), u Nongmaithem Haridash Singh (56), u Khundogbam Tomba Singh (40), bad kine baroh ki dei nongshong shnong jong ka Kakching Lamkhai, kaba don ha Kakching distrik.
“Kine ki la donkti ha ka jingdawa pisa bad ban pyndonkam beaiñ ïa ki tiar siat,” la ong ka kyrwoh khubor bad bynrap da kaba ong ba kawei ka pistol M20 kaba heh 7.26×25 mm ryngkat bad u Magazine, ki tiar siat, phra tylli ki Mobile Phone, ka shithi dawa jong ka KCP(PWG) bad 80 tylli ki Blank Tax Receipt jong ka KCP(PWG ) la ïoh ban kurup na ka jingkhmih bniah ïa ki.
Ha kajuh ka por, ka sorkar Manipur ka la rai ban pynïaid biang ïa ki kali paidbah hapdeng ki distrik hapoh ka jingpahara kaba tyngeh naduh Imphal sha ki distrik kiba don ha ki jaka lum naduh hynnin ka sngi hapdeng ka por ba dang kynjah ki jingïakynad ha ka jylla, la ong ka hukum ba la pynmih da ki heh sorkar.
Kane kan dei ka jingpyrshang kaba ar jong ka sorkar ban sdang biang ïa ka jingpynïaid ïa ki kali paidbah ha ki 19 bnai ha ka jylla kaba la sakhi ïa ki jingïakynad hapdeng ki jaitbynriew Meitei kiba sah ha ka them Imphal bad ki Kukis kiba sah ha ki distrik ba don ha ki jaka lum.
