Georgia, Nohprah:
Katkum ki khubor, la ong ba ka la mih ka jingkulmar kaba jur ha ka nongbah Georgia ha ka Sngi Balang hadien ba ki pulit ki la leit ban khynra ia ki shlem treikam jong ki seng ka liang pyrshah bad kaba la wanrah ia ka jingpynrem jur na kiba bun halor katei ka jingleh donbor jong ki pulit bad ki bor pynïaid ha kane ka kynti.
Kane ka jingleit khynra jong ki pulit ka long hadien ba u Myntri Rangbahduh ka ri, u Irakli Kobakhidze, u la kular ban pynsangeh noh ïa ki jingïakhih kiba kyrshan ïa ka EU, kiba la pynkhihwin ïa ka nongbah Tbilisi, naduh ka ilekshon Parliamentary, kaba la khihwin bha jong ka 26 tarik u Risaw.
Hadien kane, la ong ba ki pulit Georgia ki la shoh bad kem ïa u nongïalam jong ka Akhali Liberal Opposition Party bad ki la pynlong ruh ka jingkhynra ïa ki shlem treikam jong ka seng Droa.
Ka nongïalam jong ka Droa, ka Elene Khoshtaria, ka la thoh ha ka rynsan ‘X’ bad kren ïa ki kyntien kiba ong ba ha katei ka sngi kitei ki pulit ki don ha ka shlem treikam jong ka seng jong ka bad ki dang wad bad khynra shitom da ka jingkyrmen ruh ba kin lap ïa kaei-kaei ka daw ban ïoh pynngat ïa ki katto- katne ki dkhot jong ka seng ha ki jingpharep lamler.
Namar la ong ba, da ki phew hajar ngut ki nongïakhih ki la mih sha surok ban kynnoh ba ka don ka jingleh thok ha ka ilekshon ba la dep bad ka la mih ruh ka jingpynrem ïa ka rai jong ka sorkar ban pynsangeh noh ïa ka jingïakren ban long dkhot jong ka EU haduh u snem 2028.
La ong ba katei ka jingïakhih ka la long kaba shyrkhei, ha kaba ki la don kumba 300 ngut kiba la shah kem bad da ki phew ngut kiba la mynsaw ha katei ka jingïakynad hapdeng ki nongïakhih bad ki pulit, shabar jong ka ïing parliament ha Tbilisi.
Ka jingleh jong ka sorkar ka la shah kynthoh jur, ha kaba ki nongïalam ka liang pyrshah ki la kynnoh ba ki bor synshar ki la shu pynshitom beiñ ïa ki nongïakhih ba la shah kem bad ki pynlong pynshitom beiñ haduh katta hi ïa kitei ki paidbah nongïakhih, ha kaba ka US bad ka EU, ki la pynrem jur halor katei ka jingleh jong katei ka sorkar, ha kaba katto-katne ngut ki nongmihkhmat bad uwei u Symbud Myntri kam bar ri, ki la iehnoh kam kum ka jingpyrshah halor kane ka jing-leh jong ka sorkar.
Kane ka jingeh ka la pynpaw shai ïa ka jingïapher jingmut kaba jylliew bha hapoh ka imlang sahlang jong ka Georgia, namar ka seng Georgian Dream kaba synshar ka la shah kynnoh ba ka la nang jan sha ka Russia wat la ka don ka jingsngew pyrshah kaba jur ïa ka Russia. Ka seng ka la pynroi ïa ki aiñ kiba long kum ka Russia kiba thmu ïa ki seng-bhalang bad ki lad pathai khubor laitluid, kumjuh ban khanglad ïa ka hok jong ki LGBTQ.
Wat la ka Russia bad ka Georgia kim don ka jingïadei kaba thikna, hynrei naduh ba baroh ar tylli ki ri ki la ïakhun ha u snem 2008, ka nongaiktien jong ka tnat kam bar ri ka Maria Zakharova ka la ong ha ka Sngi Palei ba ka Russia ka plie lad ban pynroi ïa ka jingïadei kaba kham jan bad ka Tbilisi.
