New Delhi, Nohprah:
Shi sngi hadien ba ka kynhun Mahayuti ba la ïalam da ka seng BJP ka la jop ïa ka ilekshon sha ka ïingdorbar thawaiñ jong ka Maharashtra, ka kynhun jong ka Congress ka la ïakynduh ïa ka Election Commission ha ka sngi Ba-ar ban pynpaw ïa ka jingsngewkhia halor ki jingtip ba bniah jong ki nongthep vote, kynthup ïa kaei kaba ki la ong ba ka la long ka jingkiew kaba “kyndit” da 13% jong ki nongthep vote na ka ilekshon Lok Sabha ha une u snem.
Ka EC na ka liang jong ka, ka lah ban jubab ïa ki jingeh jong ka seng lyngba ka jingthoh, la ïathuh ki tyllong khubor ba la wan na ka EC.
Kane ka kynhun kaba kynthup ïa u Abhishek Manu Singhvi, u Mukul Wasnik, u Pawan Khera, u Nana Patole bad u Praveen Chakravarty, ki la pan na ka EC ïa ki “Raw Data” jong ki 39 lak ngut ki nongthep vote kiba la pynrung ha ka thup kyrteng naduh ka ilekshon Lok Sabbha ha kaba sdang jong une u snem.
U Singhvi u la ong ba ka seng ka la buh jingkylli halor ka jingbun ki nongjied kiba la shah weng na ka thup kyrteng ha ki san bnai hapdeng ka ilekshon LS bad Assembly.
Ka seng ka la aiti ruh ha u CEC u Rajiv Kumar ïa ka jingbishar bniah ba la leh da ka kynhun jong ka Congress’ Data Analytics.
Katkum ka jingbishar bniah, 74.5 lak ngut ki nongthep vote ki kham bun ha ka ilekshon sha ka ïingdorbar thawaiñ haba ïanujor bad ka Lok Sabha.
Katba kane ka jingkiew ka long 13%, ka jingkiew jong ka jingwan thep vote hapdeng ka ilekshon Lok Sabha 2019 bad Maharashtra Assembly ka long 2%.
Ka seng ka la ong ruh ba ki 118 tylli ki konstitwensi ki don ka jingkiew jong ki nongthep vote da 25 hajar ne palat ha ka jingthep vote ha ïing dorbar thawaiñ haba ïanujor bad ka Lok Sabha, bad ka BJP ka la jop 102 tylli na kita ki konstitwensi.
