Vijayawada, Nohprah:
U Myntri Rangbah ka Andhra Pradesh u N Chandrababu Naidu u la pynthikna ïa ki seng synroplang hapoh ka kynhun Myntri jong u ban pynlong ïa ka jingtohkit da ka CID (Crime Investigation Department) halor ka jingkhaïi tuh ïa u khaw PDS bad ki jingpyndkoh treikam ha Ka Kakinada Port.
Hadien ka jingïalang jong ka kynhun Myntri ha ka sngi Ba-ar, u Naidu u la ïakren bad ki katto katne ngut ki Myntri, ba kynthup ïa u K Pawan Kalyan, uba dei u Myntri Rangbah ka jylla, halor katei ka phang.La ïakren ruh halor ka jingkynnoh pynkynriah jubor ïa ka jingïatreilang ha ka kad liengsuiñ jong ka Kakinada bad ka Kakinada SEZ (Special Economic Zone). U Myntri Rangbah ka jylla u la pynshisha da kaba ong, “Ki (ka sorkar YSRCP barim) ki la knieh jubor ïa ka Kakinada Port bad ka Kakinada SEZ.
Ki la mang 41% sha u KV Rao (chairman jong ka Kakinada Seaports Limited) bad 59% sha ka Aurobindo Realty and Infrastructure Limited.” U Myntri Rangbah u la kdew ruh ïa ka jingdonkam ban lum ïa ki jingmut jong ki paidbah halor ki skhim sorkar lyngba ka IVRS (Interactive Voice Response System) ban bishar bniah ïa ka jingktah jong ki. Nalor kata, u Naidu u la bthah ïa ki Myntri ban sei madan ïa ki jingbymïiaid beit ha ki bynta bapher bapher hapoh ka jingsynshar jong ka YSRCP bad pynthikna ïa ki ba baroh kiba kum kine ki mat kin hap hapoh ka jingtohkit jong ka kynhun CID.
