Amlarem, Nohprah 06
Ka lympung ïalehkai Super Division bad Lower Division ba la pynïaid da ka Amlarem Sub Divisional Sports Association (ASSA) ka la nang jam shaphrang ha madan Mini Stadium Ladjaplem ha ka Sngi Thohdieng ka 6 tarik Nohprah.
Haba phai sha ka Super Division, ka jingïalehkai ka la kut da ka jingïakhaid khlem don thep kol hapdeng ka YC Pdengkarong pyrshah ïa ka Jarian CSC.
Ha ka Lower Division, ka Jong U Shen ka la pynliem noh ïa ka Amlari Model da 2-0 kol bad ïa kine ki kol la thep da u Phira Lakashiang (17) bad Ram Tariang (22).
Ka Iatyllilang Umsalang ka la jop pyrshah ïa ka Ammutong Pyrshang da 3-0 kol. Ïa kine ki kol la thep da u Maia Lyngdoh (2), Rimiki Suchiang (45) bad Fasterson Lamurong (54-Own Goal).
Ha shwa kane, ka jingïalehkai hapdeng ka Nongtalang Chnongthmai pyrshah ïa ka Krangpamtadong SC ka la kut da ka jingïasam mar 1 poiñ. Ïa ka kol jong ka Nongtalang la thep da u Sebarius Pohtam (25) bad na ka Krangpamtadong la thep da u Ronald Tariang (54).
