Lucknow, Nohprah:
Kum shi bynta ban wanrah ïa ki lad jingïada bad ki jingshngaiñ ïa ki nongshong shnong, la pynkhlaiñ ïa ka jingpahara ha ka nongbah Ayodhya jong ka Uttar Pradesh ha ka sngi Thohdieng namar ba ka dei ka lyngkhuh jingdap 32 snem jong ka jingshah pynpra jong ka Babri Masjid.
Ha kaba ïadei bad kane la pyntreikam ïa ki pulit, ki kynhun Anti Terrorist Squad (ATS) Commando na ka bynta ban pynthikna ïa ka suk ka saiñ ha ka nongbah. Haba ïakren bad ki lad pathai khubor, u Superintendent of Police Security na ka bynta ka Shri Ram Janmabhoomi Balachari Dubey u la ïathuh ba ki pulit ka Central Reserve Police Force (CRPF), ki PAC, ki ATS bad ki Pulit Civil Police ki la shah pyntreikam na ka bynta ka jingpahara.
U la bynrap da kaba ong ba la pynleit jingmut bha halor kane ka kam ban pynthikna ba ki riewngeit kin ym mad ïa kino kino ki jingeh ne ki jingtieng jingsyier.
“Ha Ayodhya, na ka bynta ki daw jong ka jingshngaiñ, ki pulit CRPF, PAC, ATS, bad ki pulit paidbah ki dang pahara ha katei ka jaka. La peit bniah ïa ki kali bad ki briew. La pyrkhat bha ban pynthikna ba ki riewngeit kin ym ïakynduh ïa kino kino ki jingeh.”
La pynkhlaiñ ruh ïa ka jingpahara ha Sambhal distrik jong ka Uttar Pradesh hashwa ka jingduwai ba ju long ha ka sngi Thohdieng ha Shahi Jama Masjid, hadien ka jingkawang maw ba la jia ha ka 24 tarik Naiwieng.
Kane ka jingkawang maw kaba la jia ha ka 24 tarik, Naiwieng ka la long ha ka por ba ki Archaeological Survey of India (ASIs) ki dang khmih bniah ïa ka jaka mane blei jong ki Muslim ka jaka mane blei ba la tei ha ka juk ki Mughal, ha kaba kane ka la wanrah ïa ka jingïap jong saw ngut ki briew bad pynmynsaw ïa kiba bun kiwei pat, kynthup ïa ki heh sorkar bad ki nongshong shnong.
Kane ka jingwad bniah jong ka kynhun ASI ka long hadien ka jingujor ba la mudui ha ka ïingbishar jong ka thaiñ, kaba la kynnoh ba ka jaka jong kane ka Mosque ka dei ka khyndew ba la shna ïa ka Temple Harihar.
Hadien kane ka jingjia, u Rahul Gandhi, ka MP jong ka Wayanad ka Priyanka Gandhi bad kiwei kiwei ki nongïalam jong ka seng Congress ha ka 4 tarik, Nohprah ki la pyrshang ban leit sha Sambhal ban ïakynduh ïa kiba haïing-hasem jong kitei kiba la khlad noh ha ka jingjia. Hynrei ki la shah khang lynti ha ki pulit ha khappud Ghazipur bad kim shym la lah ban leit sha ka jaka ba la shah thombor ha Sambhal.
Kumta ki la leit phai biang sha Delhi. Ka Babri Masjid ka la shah pynpra ha ka 6 tarik, Nohprah, 1992, ha Ayodhya da ka kynhun kaba bun jong ki ‘kar sevak’.
Hadien kata, bun ki jaka sah jong ki Muslim ha Ayodhya ki la shah pynpra, shah thang bad shah pynjot. Ki jingkulmar ki la mih ha ki bynta bapher bapher jong ka ri, ha kaba palat 1,000 ngut ki briew ki la ïap.
