Washington, Nohprah:
U Secretary of State jong ka United States- u Antony Blinken u la ong ha u President ka Turkey- u Recep Tayyip Erdogan ha ka Sngi Palei ba ki paidbah ka Syria ki donkam bha ban ioh ia ka jingiada kyrpang ha kum kane ka por bad kane ka khubor ka long ruh hadien ba ki kynhun lehnoh Islamist ki la pynkhyllem noh ia ka sorkar jong katei ka ri.
Utei u heh ka US u la ioh ban iakynduh ia utei u nongialam ka Turkey ha ka Sngi Palei ha ka jing-iakren bniah kumba 1 kynta tam hapoh ka jaka shong ba la pynkhreh kyrpang ha ka Kad Liengsuiñ jong ka nongbah Ankara, tang khyndiat por shwa ba utei u nongialam ka Turkey un leit ban her noh sha Hungary da ka liengsuiñ na katei ka jaka ban ioh iakynduh pat ia ki nongialam jong kane ka ri.
Kumta, la ong ba ha katei ka jingiakren markhmat hapdeng jong ki ha katei ka sngi, u Blinken u la ioh ban iakren bad u Erdogan halor ka jinglong-jingman hapoh Syria bad ka jingdonkam kongsan na ka bynta ki paidbah nongshong shnong katei ka ri ha kane ka por ba ki dei beit ban ioh ia ka jingiada kyrpang la kumno-kumno ruh namar ka jingim jong ki kam shngaiñ shuh bad ki lah ban shah synshar donbor kham palat shah ban ia kaba ki lehnoh Taliban ki la leh ia ki paidbah ka Afghanistan ha kine ki snem ba ka Taliban ka la ioh ban knieh ia ka bor synshar ha katei ka ri.
