Moscow, Nohprah:

Kawei ka jhad kit umphniang jong ka Russia kaba kit da ki hajar ton mar umphniang ka la phiah ha ka eriong kaba jur ha ka Sngi U Blei, ha kaba ka umphniang kaba don ha katei ka top ka la tuid lut sha Kerch Strait, katba kawei pat ka jhad kit umphniang ruh ka la don ha ka jingeh hadien ba ka la shah pynjulor noh ha katei ka sngi, ha kaba uwei u briew u la khlad hashen ha katei ka jingjia.

Katei ka jhad Volgoneft 212, kaba jrong 136 meter, kaba don 15ngut ki briew, ka la pait arliang, ha kaba ka tduh ka la ngam jyllop, la pyni da ki dur na ki lad pathai khubor jong ka Sorkar Jylla ha kaba ka um ka la tuid sha madan jong ka jhad.

Katei ka jhad kaba don ia ka lama jong ka Russia, kaba la shna ha u snem 1969, ka la shah pynjulor bad ka la ngam jyllop, la iathuh ki heh sorkar. Kawei pat ka jhad kaba don ka lama jong ka Russia, ka Volgoneft 239, kaba jrong 132 meter, ka la ngam jyllop hadien ba ka la shah pynjulor, ong ka tnad ba kyrkieh. Ka don 14 ngut ki nongtrei bad la tei ia ka ha u snem 1973.

Baroh ar tylli ki tanker ki lah ban kit kumba 4,200 ton ki mar umphniang.

Ki jingpynbna jong ki bor sorkar kim shym la ai jingtip bniah shaphang ka jingheh jong ka jingtuid um ne balei ba kawei na ki tanker ka la mad ia ka jingshah pynjulor kaba jur bha.

Ki jhad ki don ha Kerch Strait hapdeng ka Mainland Russia bad ka Crimea, kaba ka Russia ka la knieh na Ukraine ha u snem 2014, ha kaba ki la pynmih ïa ki dak jingma. Ka Russia, ka iathuh ba palat 50ngut ki briew bad ki tiar ki tar, kiba kynthup ia ki liengsuin Mi-8 bad ki liengsuin kit jingpyllait im, ki la don ha katei ka jaka.

Ka kot khubor jong ka Russia, Kommersant, ka iathuh ba katei ka jhad kit umphniang Volgoneft 212, ka kit kumba 4,300 ton ka umphniang.