France, Nohprah:
U President ka Brazil, Luiz Inacio Lula da Silva, u la mih noh ha ka Sngi U Blei na kawei ka Hospital ha Sao Paulo, hadien ba la shah sumar kyrkieh na ka bynta jong ka khlieh.
Hadien ka jingai jingkren ba kyrpang jong u sha ki nongthoh khubor ha katei ka sngi, u la phuh samrkhie bad rah kti sha kiwei pat ki nongthoh khubor katba u dang mih na katei jaka sumar.
U Lula u dang dep shah sumar pura ha ka Sngi Ba-ar ha kaba ki doktor ki la puid ia ka khlieh jong u ban sumar ia ki jingmynsaw bad jingshitom kiba la ktah jur ia u naduh u Risaw ba u la ur ha ka kamra sum jong ka jaka sah jong u.
Kumta ha ka Sngi Palei pat u la leit ban shah sumar kham bha ban pynduna ia ka jingma jong ka jingmih snam shuh shuh ha ka jaka ba la ktah jur ia ki shyieng khlieh jong u.
La ong ba utei u President u lah ban sdang biang ia ki kam hynrei un donkam ruh ban shongthait shuwa kumba 15 sngi.
Kumta, la ong ba u Lula un dang hap hi ban sah hapoh Sao Paulo tad haduh ka Sngi Palei, ha kaba un hap ban leh ïa ki test ba bud. Shisien ba la pynkhuid, un sa lah ban leit phai biang pat sha Brasilia bad ban bteng biang ia ki kam- ki jam jong u baroh ha rukom ba ju leh barabor.
Kawei pat ka doktor, ka Ana Helena Germoglio, ka la ong ba ka jingkoit jingkhiah jong u Lula ka la kham bha bun shah ban ia kaba ki khmih lynti.
Namar la ong ba katkum ka jingpeit thuh ia ka MRI Scan ba la dep ban leh ha katei ka taiew ba la lah, la shem ba ka don ka jingthud bad jingmih snam ha ka jabieng jong u bad kaba la pynlong ia u ban shah kit sha jaka sumar naka bynta ban pynioh ia ka jingsumar kaba kyrkieh ha ka hospital Sirio-Libanes, kaba long ka jaka sumar ba ha khlieh duh jong katei ka ri.
