Pynkup burom ka DSLP ïa ki ‘thei ïalehkai karate ba wanrah burom ïa ka Jylla

Ka Dorbar Shnong Law-mali Pyllun ha ka 12 tarik u Nohprah 2024, ka la pyn -kup burom ïa ar ngut 'thei ïalehkai karate kiba la wanrah burom ïa ka Jylla da kaba khur takma ksiar...

Shillong, Nohprah 16

Ka Dorbar Shnong Law-mali Pyllun ha ka 12 tarik u Nohprah 2024, ka la pyn -kup burom ïa ar ngut ‘thei ïalehkai karate kiba la wanrah burom ïa ka Jylla da kaba khur takma ksiar ha ka 8th International Karate Championship Indian Challenger Cup 2024 kaba la long ha Netaji Indoor Stadium, West Bengal.

Ïa kane ka jingpynkup burom la pynlong ha Com -munity Hall jong ka shnong ryngkat ka jingïa donlang u Rangbah Shnong bad ki dkhot ka Executive Committee, ki dkhot ka Lawmali Pyllun Sports Club, Seng Kynthei Lawmali Pyllun, Seng Samla Lawmali Pyllun, ki nongshah pynkup burom lem bad ki kmie ki kpa.

Ïa kane ka lympung kaba la sdang naduh 26 haduh 28 tarik u Naitung, la pynïaid da ka ‘All India Seishinkai Shito Ryu-Karate-Do Federation (AISSKF) bad ka Karate -Do Association of Bengal (KAB).

Kitei ‘thei ïalehkai kiba la wanrah burom ïa ka Jylla ki long ka Iwan-naki L. Khongji kaba la khur takma ksiar ha ka Kumite Cadet 42kg bad ka Phidaiakashisha Lyngdoh kaba la khur takma ksiar ha ka Kumite Cadet 54kg.

Ïa ka jingïalang la pynïaid da u Bah R.J.Nongbet uba long u Organising Secretary jong ka Dorbar Shnong uba la  ai khublei ïa kitei ki samla bad pdiang sngewbha ruh ïa baroh kiba la poi sha kane ka jingïalang. Kiba la ai jingkren ha katei ka sngi ki kynthup ïa u Rangbah Shnong Bah B.Khongwir,u Gen.Secy. ka LPSC Bah A.Pyrtuh, Gen.Secy.ka Seng Samla samla S. Jyrwa, i Assistant Secretary ka Seng Kynthei Kong J.Surong bad kiwei.

Ha ka jingkren jong U Bah B.Khongwir uba long u Rangbah Shnong, u la kyntu ruh ïa kine ki samla ba kin nang trei shitom shuh shuh bad ban long ruh ki samla kiba long discipline bad kitbok kitrwiang ba kin dang ïai kiew irat ha kane ka jingïalehkai. U la kyntu ruh ïa baroh ki samla jong ka shnong ban shim bynta ha ki jingkilan met bapher bapher bad ban pyndonkam ïa ki jaka ïalehkai ba ka shnong ka don kum ka badminton, football, table tennis bad kiwei kiwei.