Canada, Nohprah:
Katkum ki khubor la ong ba ha ka sien kaba nyngkong, kawei na ki Myntri tnat pla tyngka jong ka ri Canada- ka Chrystia Freeland ka la hiar shuki noh hadien ka jingbym iabeit bad u Myntri Rangbahduh katei ka ri- u Justin Trudeau.
Ka Freeland, ka long kawei na ki para-lok ba shaniah bha jong u Trudeau, ka la pynpaw ba kane ka rai ka la mih hadien ka jingbym sngew ïahap jingmut shuh bad u Myntri Rangbahduh halor kumno ban jubab ïa ki jingbyrngem jong u President ba la jied jong ka US, u Donald Trump halor ka jingbuh khajna. Ha ka shithi iehnoh kam jong ka, ka la ong ma ka bad u Trudeau ki ïapher jingmut halor ka lynti kaba bha tam na ka bynta ka Canada bad ka la kynthoh ïa ka jinglong riewlum jong u Trump ha ka liang ka ioh ka kot.
Kumta la ong ba ka jingiehnoh kam jong katei ka nongialam ha kane ka por, ka la jia tang shwa katto-katne kynta ba kan ai jingpynbna ia ka mang tyngka bad ki kam pisa ba ju pynbna man la u snem ha ka iing dorbar thawain. Kane ka la long ruh hadien ba la pynmih ia ka kaiphod jong ka jingduna pisa kaba C$60 billion.
