Shillong, Nohprah 17
Ka kynhun ïalehkai ka Jylla ka la mad ïa ka jingshah rem ha ka Kerala da 1-0 kol ha ka jingïakhun kaba ar jong ka wat khatduh ha ka Senior Men’s National Football Championship (Santosh Trophy 2024-25) ha ka sngi Ba-ar ha Hyderabad.
Wat la ka la ïakhaid mar 2-2 kol bad ka Tamil Nadu ha ka jingïakhun kaba nyngkong, pynban ha kane ka jingïalehkai kaba ar ka la long kaba ïakhaid bha namar baroh ar kynhun ki la long kiba khlaiñ bor.
Hadien shiteng kynta ka Kerala ka la ïoh ban pynkhih jar nyngkong eh lyngba u Muhammad Ajsal ha ka minit kaba 37. Kane ka shi kol ka la pynlong ïa ki rangïalehkai ka Meghalaya ban ïakhun tyngeh, hynrei kam shym la lah ban pynphai haduh kaba kut ka jing-ïalehkai jong ka kylla step.
Ha ka kylla miet, na ka liang u Bah Hering Shangpliang (coach) u la bujli haduh saw ngut ki rangïalehkai kiba kynthup ïa u Owanijuh Pajuh, Kevin Rymbai, Deibormame Tongper bad u Fairming Suting. Haduh kaba kut ka Meghalaya ka la ïoh ïa ki kabu kiba biang, hynrei kam shym la lah ban pynphai bad ka la hap ban mad ïa ka jingshah rem.
Ha kawei pat ka jingïakhun jong ka Group-B, ka Odisha ka la pynliem noh ïa ka Goa da 2-0 bad ka Delhi ka la jop da 2-0 kol ïa ka Tamil Nadu. Kumta ka Delhi bad ka Kerala ki la ïoh ban bat ïa ki kyrdan ba hakhlieh da kaba ïaryngkat mar 6 point na ki ar sien ïakhun. Ka Odisha ka la wan balai ryngkat 3 point, katba ka Meghalaya bad ka Tamil Nadu ki dang ïa ryngkat mar 1 point.
Te kumta ka Meghalaya kan pynkhreh ïa ka jingïakhun ba ar pyrshah ïa ka Delhi ha ka Sngi Palei ha ka por 2:30 nohphai sngi.
