Nongstoiñ, Nohprah 19
Ka West Khasi Hills District Chess Association (WKHDCA) ryngkat bad ka jingïasnoh kti lang bad ka Hynñiewtrep Youth Council WKH, ka la pynlong ka jingrakhe ïa ka lyngkhuh sngi ïap ba 84 jong u Myllung Soso Tham ha Nongstoiñ ha ka sngi Balang, da kaba pynlong ïa ka jingïalehkai chess ba la tip kum ka Nongstoiñ Open Chess Championship.
Ha katei ka sngi la ïadon lang u Wanteibok Lyngdoh, Secretary ka HYC WKH kum u kongsan ha ka jingïadon lang u symbud kongsan u Bah Damir Tham, kumjuh u Bah Angelbert Tham, ki nongkitkam ka synjuk, ki longkmie longkpa ryngkat bad 30 ngut ki khynnah skul kiba la wan ïashim bynta.
La ïoh ka jingkren na u kongsan bad symbud kongsan shaphang u Soso Tham bad batai shaphang ka jingmyntoi ïa ki khynnah skul kiba ïalehkai Chess bad ki la kyntu ruh ïa ki khynnah ba ki dei ban pyndonkam hok ïa ka por bad ban lait barabor na ki kam sniew.
Ki Arbiter ba pynïaid ïa kane ka lympung ba saw tylli ki wat ki long u Bah Toteinam Lyngdoh Marshillong (Senior Arbiter) bad Bah Banshan Marngar (Chess Coach) kiba dei ruh ki nongkitkam jong ka South West Khasi Hills District Chess Association.
Ha ka kyrdan ïalehkai jong ka Under-10 boys la jop da u Paila Maïanbor Jyndiang bad ba-ar u P. Shanlemkime Lyngdoh. Ha ka Under-13 Boys la jop da u Freedy Tympuiñ, ba-ar u Macdonald Marweiñ bad balai u Miquel Marweiñ. Ha ka Under-13 Girls la jop da ka Phibanri Diengngan, ba-ar ka Angel Bapynbiang Khardewsaw bad balai ka P. Nakisaphi Lyngdoh. Ha ka kyrdan ïalehkai jong ka Under-16 boys la jop da u Lallomom Shyrkon, ba-ar u Ronyson Shyrkon bad balai u Brian CJL Marshillong. Katba ha ka Open Category la jop da u Imson Nongbak, ba-ar u Bansahnam Shyrkon bad balai ka Gavy Jones L Marshillong.
