Shillong, Nohprah 22
Ka Meghalaya ka la lah ban pynthikna ban jam sha ka quarter final jong ka Senior Men’s National Football Championship na ka bynta ka Santosh Trophy 2024-25, hadien ba ka la lah ban pynliem noh ïa ka Goa da 1-0 kol ha ka jingïakhun jong ka Group-B ha ka Sngi U Blei ha Hyderabad.
Wat hapdeng ka jingbun tylli ki kabu ksiar ba ka la ïoh, hynrei dei lyngba ka penalty ba ka la lah ban pynurlong ha ka minit kaba 89 na ka bynta ban ïoh pynkhih jar.
Kane ka la wan hadien ba uwei u rangïalehkai shadien ka Goa u la tan ïa ka sopti jong u Deibormame Tongper bad dei hangne ba u rephri u la kdew beit sha ka penalty. Kumta u Damanbhalang Chyne um shym la pynlehnohei ïa kane ka kabu ksiar na ka bynta ban thep hi jlang.
Ha ka jingshisha u Shubert Pereira u la dei ban ïoh pynphai na ka bynta ka Goa, hynrei u la thep kol hadien ba la pynsangeh ïa ka jingïalehkai.
Ha baroh kawei ka jingïalehkai ka kynhun ïalehkai ka Jylla hapoh ka jingïalam u Bah Hering Shangpliang ka la lah ban ïalehkai bha da kaba ïoh bun tylli ki kabu ksiar, hynrei ka Goa ka la lah ban ïashan tyngeh ban pyllait na ka jingshah thep lyngba ka jinglah ban ïalehkai bha rangapkol u Sanij Bugde.
Na ka liang u Bah Hering u la bujli ar ngut ki rangïalehkai ban wanrah ka jingkylla na ka jingïakhun ba la dep pyrshah ïa ka Delhi, ha kaba u Fullmoon Mukhim u la wanphai biang hadien ka jingmynsaw ryngkat bad u Owanijuh Pajuh, katba u Arlangky Nongsiej bad u Khrawkupar Jana ki la hap ban shong ben ha kane ka jingïakhun.
U Khrawkupar u la wan kum u nongbujli ha ka kylla step ryngkat u Owanijuh bad u Donlad Diengdoh ban pynlong ïa ka Meghalaya kum ka kynhun kaba khlaiñ bor. Kumba ka paw kane ka kynhun kam pat ju lah ban jop pyrshah ïa ka Goa ha ka wat khatduh jong ka Santosh Trophy.
Ha ka aïom ba la dep, ka Goa kaba la wan ba-ar, ka la hiar mynta sha ka kyrdan ba shatrai jong ka Group-B bad ha ka sngi Palei ka la shah rem da 1-0 kol ha ka Tamil Nadu, katba ka la lah pat ban jop ar sien bad ka jingjop kaba nyngkong ka dei da 2-0 kol pyrshah ïa ka Delhi.
Wat la katta ruh ka penalty jong u Damanbhalang ka la pynïoh ïa ka Meghalaya ïa ki poiñ kiba donkam bha. Ha ka jingïakhun kaba kham mynshwa mynta ka sngi, ka Odisha ka la ïakhaid mar 1-1 bad ka Tamil Nadu. Ka Delhi bad ka Kerala kin ïa kynduh mynta ka janmiet.
Wat la katta ruh ka penalty jong u Damanbhalang ka la pynïoh ïa ka Meghalaya ïa ki lai poiñ kiba donkam bha. Ha ka jingïakhun kaba kham hashwa mynta ka sngi, ka Odisha ka la ïakhaid mar 1-1 bad ka Tamil Nadu.
Lyngba kane jingjop ka la pynlong ïa ka Meghalaya ban ïoh 7 point kata hadien ïa ka Kerala (9 point) kaba dang lam khmat na kane ka group, Delhi (6 point), Odisha (4 point), Goa (3 point) bad ka Tamil Nadu (2 point).
Kumta ka Meghalaya kan pynkhreh ïa ka jingïalehkai kaba khatduh shwa ban rakhe ïa ka Khristmas kata ha ka 24 tarik pyrshah ïa ka Odisha ha ka por 9 baje mynstep.
