Singapore, Nohprah
Uwei u rangbah ba la 25 snem ka rta uba dei u nong India ha Singapore u la shah rai set patok shi snem san bnai bad hynriew taiew hadien ba la kam ba u donkti ha kawei ka jingkynnoh ba u la thombor ïa la u kpa bad kawei ba u la leh beijot ïa kawei ka kynthei.
U Arjune Ravi, u la thombor da kaba kura bunsien ïa la u kpa (64 snem) bad u la ïai bteng ïa kane wat la u tip ba ki ophisar pulit ki la ap ban rung ha ka jaka sah (flat) jong ki ha ka 10 tarik Jymmang, ong ka khubor The Straits Times.
Hadien kata, ki pulit ki la kem ïa u Arjune bad pynkit noh ïa u kpa sha hospital, ha kaba la lap ba u don bun ki jingmynsaw kynthup ïa ka jingmynsaw bad orpait ki shyieng ha bynta jong ka durkhmat.
Ha kawei pat ka jingjia, u Arjune u la leh beijot ïa kawei ka kynthei kaba dang 24 snem ka rta ha ka Little India enclave ha u bnai Naiwieng 2023.
U Deputy Public Prosecutor (DPP) Zhou Yang, u la ïathuh ha ka ïingbishar ba u Arjune u don ha Buffalo Road, ka lynti ïew, ha ka por kumba 9 baje mynmiet ha ka 10 tarik Naiwieng, 2023, ha kaba u la leh beijot ïa kawei ka kynthei bad u la ïaid lait noh. Kane ka kynthei ka la lah ban ring video bad shon dur ïa u Arjune shwa ba un phet krad nangta. Hadien ba ka la ai ïa ki sakhi sha ki pulit ha kaba ki la lah ban wad bad ïoh ban kem ïa u bad la rai pynrem ïa u Arjune ha ka sngi Thohdieng.
