Shillong, Nohprah 29
Ar ngut ki nongïalehkai ka Jylla, u Jev Sohtun bad ka Nazreene Marbaniang ki la ïoh jingjop ha ka All India MMA Cage Fight ba la pynïaid da ka Hades Club ha Goa ha ka 26 bad 27 tarik mynta u bnai.
Ha ka jingïakhun jong ki shynrang, u Jev ba shong ba sah ha Lumparing, u la lah ban pynliem ïa u rangïalehkai uba la bat nam lahduh ha ka pyrthei ha ka jingïalehkai kick boxing u Satya na Maharashtra tang hapoh 25 sekhon ha ka 77kg welterweight.
Katba ha ki liang ki kynthei, ka Nazreene Marbaniang (45 kg) ba shong basah ha Umlyngka, Laimer, ka la pynliem noh ïa ka Parul Yadav na Maharashtra.
Kum ban shu kdew u Jev u dei rangïalehkai ba khlaiñ bor ha ka thaiñ shatei lammihngi bad uba la jop bun ha ka Powerlifting, katba ka ka Nazreene ka dei ka khynnah kaba shah hikai ha u Jev ha Beast Fitness MMA Gym kaba don ha Laimer.
