New Delhi, Nohprah:
Ka sorkar ha ka miet jong ka sngi Thohdieng ka la ong ba ka la mynjur ïa ka jingkyrpad jong ka Congress ban mang jaka na ka bynta ka jaka ban buh sah kynmaw ïa u Myntri Rangbahduh barim u Manmohan Singh uba la khlad noh ha ka sngi Palei bad la leh burom khatduh ïa ka met jong u ha ka sngi Saitjaiñ.
Kane ka jingpynbna jong ka sorkar ka la wan tang katto-katne kynta hadien ba ka Congress ka la kynnoh ba ka jingkyrpad jong ka ban ïoh jaka shongthait ha Delhi na ka bynta u Singh kam shym la shah leh burom ha ka sorkar.
Ha ka kyrwoh ba la pyllait ha ka miet sngi Saitjaiñ, ka Ministry of Home Affairs ka la ong, “Mynta ka step, ka sorkar ka la ïoh ïa ka jingkyrpad ban mang jaka na ka bynta ban buh mot jingkynmaw ïa u Myntri Rangbahduh barim u Dr Manmohan Singh, na u President ka seng Congress. Mar ïawai ka jingïalang ka kynhun Myntri, u Amit Shah u la pyntip sha u President ka Congress u Kharge bad sha ka ïing ka sem jong u Dr Manmohan Singh ba ka sorkar kan sa mang jaka ban buh ïa utei u mot sah kynmaw. Hapdeng kata, ka jingthang bad kiwei kiwei ki jingleh niam ki lah ban leh namar ba hap ban thaw ïa ka Trust bad hap ban mang jaka.”
Ka Congress ka kwah ban thang ïa u Singh ha ka jaka ba lah ban tei ïa ka jingkynmaw ha ka burom jong u.
Ha ka jingshisha, dei ka sorkar UPA kaba la khlieh da u Singh kaba la khanglad ïa ki jingdawa ban buh kyrpang ïa ki jingkynmaw. Ha u snem 2013, ka kynhun Myntri jong ka UPA ka la rai ban buh ïa kawei ka madan kynmaw burom lang – ka Rashtriya Smriti Sthal ha Raj Ghat – namar ka jingduna ka jaka.
Ha ka step jong ka sngi Thohdieng, u President ka Congress, u Mallikarjun Kharge, u la ïakren bad u Myntri Rangbahduh ka ri, u Narendra Modi bad pynsngew ïa ka jingangnud jong ka seng jong u. U la bud ruh ïa ka da ka shithi sha u Myntri Rangbahduh. Kyrpang, baroh ki General Secretary jong ka All India Congress Committee ka Priyanka Gandhi Vadra bad u K C Venugopal ki la ïakren ïa kane ka phang bad u Myntri kam pohïing ka sorkar kmie u Rajnath Singh.
Ha ka shithi jong u sha u Myntri Rangbahduh, kaba ka seng ka la pynmih ha ka por janmiet, u Kharge u la kdew ïa ka jingïakren lyngba ka Telephone bad u ha kaba u la buh ïa ka jingkyrpad ban “pynlong ïa ki jingleh niam bakhatduh jong u Dr. Singh na ka bynta ka jingkynmaw ïa u khun bakhraw jong ka ri India.”
Kata, u la ong, kan long ha “ka jingïahap bad kum kane ka rukom ban don ïa ki jingkynmaw ïa ki nongsynshar bad ki Myntri Rangbahduh barim ha ka jaka hi jong ka jingleit ontep ïa ki.”
Haba ïathuh biang ïa ki jingnoh synñiang bad ki jingjop “ba phylla” jong u Singh bad kdew ba u bat ïa ka “jaka kaba donburom bha ha ka jingmut jingpyrkhat jong ka ri bad ki briew jong kane ka jaitbynriew”, u Kharge u la thoh, “Nga kyrmen bad shaniah ba kaba ïahap bad ka kyrdan jong u Dr. Manmohan Singh, ka… jingkyrpad ban pynlong ïa ka jingleit ontep ïa u ha ka jaka ba lah ban tei ïa ka jaka ban sah kynmaw ïa u, la mynjur.”
“Da kaba wan na ka longïing kaba rit paid bad hadien ba u la mad ïa ki jingeh bad ki jingjynjar jong ka jingïaphiah, dei lyngba ka jinglong shlur bad jingkut jingmut jong u ba u la kiew ban long uwei na ki riewstad ba pawnam jong ka pyrthei,” u la ong.
Haduh ka por janmiet, ki nongïalam jong ka seng Congress ki la ong ba ka sorkar kam shym la pdiang ïa katei ka jingkyrpad bad la ai ïa ki ban sngewthuh ba ka jingthang met ïap ka long ha Nigambodh Ghat.
